کەرکووک-KDP.info- بەرپرسی مەکتەبی ڕێکخستنی پارتی دیموکراتی کوردستانی کەرکووک-گەرمیان دەڵێت، پێگەی کورد لە پۆستە کارگێڕییەکانی کەرکووکدا لاواز بووە و زۆرینەی پۆستەکان عەرەب دەستی بەسەردا گرتووە دەشڵێ، کاتی ئەوە هاتووە هاوسەنگی بگەڕێندرێتەوە." 

هیوا ئەحمەد مستەفا، بەرپرسی مەکتەبی ڕێکخستنی پارتی دیموکراتی کوردستان لە کەرکووک-گەرمیان، لە لێدوانێکی تایبەتدا بۆ ماڵپەڕی فەرمیی پارتی دیموکراتی کوردستان گوتی، "ئێستا هاوسەنگیی کارگێڕی لە کەرکووک تێکچووە و غەدر لە کورد دەکرێت، بەجۆرێک كە زۆرینەی پۆستەکان بەر عەرەب کەوتوون.

 هیوا ئەحمەد مستەفا گوتیشی، "پرۆسەی تەعریب بەردەوامە، تا ئەو ئاستەی سوپا ڕێ لە جووتیارانی کورد دەگرێت لە کێڵانی زەوییەکانیان. بۆ بەزاندنی ئەم دۆخەش پێویستە لێکتێگەیشتن لەگەڵ عەرەب و سەرکردایەتیی سیاسی لە بەغدا بێتە ئاراوە، بۆ سەرلەنوێ دروستکردنەوەی هاوسەنگی، چونكە لە سەردەمی پارێزگاری پێشووی کەرکووک، ڕاکان جبوری کە عەرەب بوو، زیاتر لە ٧٢هەزار عەرەبی هاوردە هێنراونەتە شاری کەرکووک، ئەمەش بەپێی ماددەی ١٤٠ ڕێکارێکی تەواو نایاساییە و بە ئامانجی گۆڕینی دیمۆگرافیای ناوچەکە ئەنجام دراوە." 

بەرپرسی مەکتەبی ڕێکخستنی پارتی دیموکراتی کوردستان لە کەرکووک-گەرمیان دەشڵێت، "لایەنەکانی دیکە کەڵکیان لە ناتەبایی ناوخۆیی کورد و ڕووداوەکانی ١٦ی ئۆکتۆبەری ٢٠١٧ وەرگرتووە بۆ سەپاندنی ئەجێنداکانیان، بەجۆرێک تا ئێستاش ماڵی زۆرێک لە کادیرانی پارتی لە کەرکووک بە داگیرکراوی ماونەتەوە، ئێستا کاتی ئەوە هاتووە سەقامگیری و هاوسەنگی بۆ هەموو پێکهاتەکانی کەرکووک بگەڕێتەوە." 

بڵند ئیبراهیم