دهۆک-KDP.info- کابینەی نۆیەمی حکوومەتی هەرێمی کوردستان بە گوژمەی زیاتر لە ١٥٠ ملیار دیناری عێراقی، پڕۆژەی ستراتیژیی جووتسایدی سێمێل - سێجێ لە پارێزگای دهۆک جێبەجێ دەکات، کە لە ئێستادا کارەکانی بەچڕی بەردەوامن و نزیکەی ١٧٪ـی تەواو بووە، پڕۆژەکەش هاوکات هەلی کاری بۆ سەدان ئەندازیار و کارمەندی ناوخۆیی ڕەخساندووە.
شەعبان سەلیم، سەرپەرشتیاری گشتیی پڕۆژەی جووتسایدی قەزای سێمێل - سێجێ، لە لێدوانێکی تایبەتدا بۆ ماڵپەڕی فەرمیی پارتیی دیموکراتی کوردستان گوتی، "کارکردن لەسەر ئەم پڕۆژەیە بەچڕی بەردەوامە و یەکێکە لە گەورەترین پڕۆژەکانی ڕێگەوبان لە پارێزگای دهۆک. ئاماژەی بەوەش کرد کە ئامانجی سەرەکیی حکوومەت لەم هەنگاوە، باشترکردنی تۆڕەکانی هاتوچۆ، ئاسانکردنی گواستنەوە و پەرەپێدانی کەرتی ئابووری و بازرگانییە لە قەزای سێمێل بە تایبەتی و پارێزگاکە بە گشتی.
شەعبان سەلیم گوتیشی، "پڕۆژەکە بەپێی ستانداردی نێودەوڵەتی و بە کوالێتییەکی بەرز دیزاین کراوە، کە گرنگترین بەشەکانی ئەمانەن، دروستکردنی شەقامێکی جووتسایدی مۆدێرن بە درێژایی ٦ کیلۆمەتر، لەگەڵ هەڵگرتن و قیڕتاوکردنەوەی پڕۆفیشناڵی ٢.٥ کیلۆمەتر لە شەقامی سەرەکیی زاخۆ - دهۆک، دروستکردنی ٤ بەرزەپردی جیاواز (٣ پرد لەسەر ڕێگەی سەرەکیی زاخۆ - دهۆک، و پردێکی تر لە نێوان ناوچەکانی تەناهی، زاخۆ، سێمێل و سێجێ) و دانانی ٢٠ کیلۆمەتر ئاوڕێژی پایپ و سیستەمی (Drain) بە قەبارەی جیاواز (٦٠، ٩٠، ١٢٠ سم)، لەگەڵ دروستکردنی ئاوەڕۆی سندوقی بە درێژایی ٦ کم بە مەبەستی کۆنتڕۆڵکردنی ئاوی باران و ڕێگریکردن لە لافاو و بە مەبەستی پاراستنی ژینگەش، ٢٠٪ـی کۆی پڕۆژەکە دەکرێتە ناوچەی سەوزایی.
سەرپەرشتیاری پڕۆژەکە تیشکی خستە سەر ڕەهەندی مرۆیی و تەکنیکیی کارەکان و ڕایگەیاند، لە ئێستادا ١٥ ئەندازیار و ٤٢٠ کارمەند لە بوارە جیاجیاکاندا سەرقاڵی کارکردنن، هاوڕێ لەگەڵ بەکارهێنانی ١٤٠ ئامێری جیاواز و پێشکەتووی سەردەمیانە گوتیشی، "ئەم پڕۆژە ستراتیژییە کە بە گوژمەی ١٥٠ ملیار دینار لەسەر بودجەی حکوومەتی هەرێمی کوردستان جێبەجێ دەکرێت، لەگەڵ تەواوبوونیدا دەبێتە هۆکاری گۆڕانکارییەکی ئەرێنی گەورە لە کەرتی گواستنەوە، هاتوچۆ و بوژانەوەی بازرگانی لە تەواوی دەڤەرەکەدا.
ئەژین غەفار