هەولێر- KDP.info- هاوکات لەگەڵ دەستپێکردنەوەی فەرمی خولی دووەمی یاسادانانی پەرلەمانی عێراق، د. هەڵات بەرواری، ئەندامی ئەنجومەنی نوێنەرانی عێراق لە فراکسیۆنی پارتی دیموکراتی کوردستان، ئاشکرای کرد کە پێشبینی دەکرێت لە سەرەتای هەفتەی داهاتوودا خشتەی کاری دانیشتنەکان دیاری بكرێت و بڵاو بکرێتەوە.
د. هەڵات بەرواری لە لێدوانێکی تایبەتدا بۆ ماڵپەڕی فەرمی پارتی دیموکراتی کوردستان (KDP.info) تیشکی خستە سەر کاری ئەنجومەنی نوێنەرانی عێراق لەم قۆناغەدا و گوتی، "هەرچەندە لیژنە پەرلەمانییەکان پێکهاتوون و ئامادەن پڕۆژەیاساکانی خۆیان بۆ خوێندنەوەی یەکەم پێشکەش بکەن، بەڵام لەم قۆناغەدا گرنگیی زیاتر بەو پڕۆژەیاسایانە دەدرێت کە لەلایەن حکوومەتەوە (وەک لایەنی جێبەجێکار) پێشکەش دەکرێن، چونکە پەیوەندیی ڕاستەوخۆیان بە بەرنامە و سیاسەتەکانی دەوڵەتەوە هەیە.
د. هەڵات بەرواری جەختی لەسەر ئامادەیی تەواوی فراکسیۆنی پارتی کردەوە و ڕایگەیاند کە پارتی دیموکراتی کوردستان لە سەرجەم لیژنە پەرلەمانییەکاندا نوێنەری هەیە. ئامانجی سەرەکی ئەوان لە هەمبەر هەر پڕۆژەیاسایەک کە دەخرێتە بەرباس، پاراستنی مافە دەستوورییەکانی هەرێمی کوردستان و چەسپاندنیانە لە ناو دەقی یاساکاندا.
قائید میرۆ