هەولێر-KDP.info- مەکتەبی سیاسیی پارتی دیموکراتی کوردستان داوا لە سەرجەم لایەنە براوەکانی هەڵبژاردن دەکات پەرلەمان کارا بکەنەوە، تاوەکو کێشەکان و پرسی پێکهێنانی حکوومەتی هەرێم لەبری ڕاگەیاندنەکان، لەناو هۆڵی پەرلەماندا یەکلایی بکرێنەوە.

دەقی ڕاگەیاندراوەکەی مەکتەبی سیاسیی پارتی دیموکراتی کوردستان.

ھاووڵاتیانی خۆشەویست

لایەنە سیاسییە بەڕێزەکانی بەشدار لە پەرلەمانی کوردستان

ھەر لەدوای کۆتایی ھاتنی ھەڵبژاردنی خولی شەشەمی پەرلەمانی کوردستان و ڕاگەیاندنی ئاکامەکانی، لە ڕوانگەی ھەستکردن بە بەرپرسیاریەتی و خەمخۆری بۆ بارودۆخی ھەرێم، ھەوڵەکانمان دەستپێکرد بۆ کاراکردنەوەی دامەزراوە شەرعییەکانی ھەرێم بەگوێرەی یاسای بەرکار، بەڵام سەرەڕای پەیام و پەیوەندی و ھەوڵە بەردەوامەکانی سەرۆک مەسعود بارزانی و پارتیمان بۆ گفتوگۆ و لێکتێگەیشتن و نزیکبوونەوە لە چارەسەری ئەو کێشانەی کە بەربەستن لەبەردەم کاراکردنەوەی پەرلەمان و ھەڵبژاردنی سەرۆکایەتی ھەرێم و پێکھێنانی کابینەی دەیەم، بە خستنەڕووی ژمارەیەک سیناریۆ و ڕێگەچارەی گونجاو بۆ دەربازبوون لەو چەقبەستووییەی ڕووبەڕووی پرۆسەی سیاسیی ھەرێم بووەتەوە، بە کۆبوونەوەی دوو قۆڵی و چەندقۆڵی، دەستپێشخەری، پێکھێنانی شاند، پەیام و سەردان، بەڵام بەداخەوە بە دەنگەوەھاتن و ھەڵوێستی ئەرێنی پێویست بەرچاو نەکەوت.

بارودۆخی ناوچەکە بەگشتی و ھەرێمی کوردستان بەتایبەتی، بەرپرسیاریەتی نەتەوەیی و نیشتمانی و ئەخلاقیمان دەخاتە ئەستۆ بۆ ھەرچی زووتر دۆزینەوەی ڕێگەچارەی دەربازبوون لەو دۆخە نەخوازراوەی ئێستا، کە جگە لە زیان گەیاندن بە ھەرێم و ئەزموون و دەستکەوتەکانمان، بۆ ھیچ لایەک سوودی تێدا نابینرێت، بۆیە کاتێک کۆبوونەوە و شاند و سەردان و پەیامەکان، ھەروەھا ھەوڵەکانمان لە گواستنەوەی باس و گفتوگۆی کێشەکان لەسەر شەقام و ڕاگەیاندنەکانەوە بۆ سەر مێزی گفتوگۆ بێ ئاکام بێ، فەرموون لایەنەکانی بەشدار لە پەرلەمان چ ئەوانەی کورسیان زۆرە و چ ئەوانەی کورسی کەمتریان ھەیە، پەرلەمان کارا بکەینەوە و پەرلەمانتاران لە ناو ھۆڵی پەرلەمان بەرپرسیار بن لە ئەنجامدانی گفتوگۆیەکی بەرھەمدار و دۆزینەوەی چارەسەری گونجاو و، ھەموولایەکمان پابەندی ئەو ڕێگا چارەسەرە بڕیارلێدراوەی پەرلەمانی کوردستان بین.

مەکتەبی سیاسی پارتی دیموکراتی کوردستان

٢٧ی حوزەیرانی ٢٠٢٦