هەولێر -KDP.info- سەرۆکی دەستەی وەبەرهێنان لە هەرێمی کوردستان گوتی "لەسەر داواکاری سەرۆکی حکوومەتی هەرێمی کوردستان شاندێکی وەبەرهێنەر و کۆمپانیای گەورەی ئەمریکا گەیشتنە هەرێمی کوردستان، بۆ ئەوەی لەچەند سێکتەری جیاواز لە هەرێمی کوردستان کاربکەن."
د.محەمەد شوکری، سەرۆکی دەستەی وەبەرهێنان لە هەرێمی کوردستان، بۆ ماڵپەڕی فەرمیی پارتی دیموکراتی کوردستان گوتی "شاندێکی باڵای وەبەرهێنەر و کۆمپانیای گەورەی ئەمریکی سەردانی هەرێمی کوردستانیان کردووە و دەیانەوێت سەرۆکی حکوومەتی هەرێم ببینن، ئەو کۆمپانیایانە بارەگایان لە ١٨ وڵات هەیە، لە چەندین بوار کاردەکەن، لەوانە تەندروستی، گەشتوگوزار، بناسازی و پڕۆژەی گەورە، سەرۆکی حکوومەتی هەرێمی کوردستان دەیەوێت بێن لە هەرێمی کوردستان کاری وەبەرهێنان بکەن."
د.محەمەد شوکری گوتیشی "دەمانەوێت پڕۆژەی گەورە لە بواری تەندروستی و گەشتوگوزار و بینای گەورە ئەنجام بدەن، چونکە پەیوەندی ئابووری هەرێم لەگەڵ ئەمریکا لە ئاستێکی باشدایە، بۆیە دەمانەوێت جگە لە بواری نەوت لە بواری دیکەش کۆمپانیای گەورەی ئەمریکا بێن لە هەرێم وەبەرهێنان بکەن."
گوتیشی "هاتنی ئەم شاندە لەسەر داواکاری سەرۆکی حکوومەتی هەرێمی کوردستانە، بۆ ئەوەی وەبەرهێنانی ئەمریکا لە هەرێم زیاتر بێت."
بڵند ئیبراهیم