سەباح بەیتوڵڵا
ڕاست دبێژن ئازادیێ و ڕزگاریێ قوربانی دڤێتن پێشمەرگێن قەهرەمان ل بەروكێن بەرخۆدانێ داستانێت مەزن توماركرن و دربێن مەزن ل دوژمنی ددان، ڕێكخستن و دلسوزێن پارتی و بارزانی دناف جەرگێ كوردستانێ دا بەرفرەتر و مەزنتر دبوون و دوژمن توشی حێبەتیێ بوون، قەهرەمانێت مە دزیندانێت دوژمنی وەكو چیایێت خۆرستی مانەڤە و بۆ چەند دڵوپێن خوینێ سەرێخۆ و بەژنا خۆ بوو دوژمنی نەچەماند و پێلاڤا وان ل تاجا دوژمنی مەزنتر بوو
بۆ تولڤەكرنا شكەستنێن خۆ دگەڵ ئەلندا سپێدێ ل ٩-٦-١٩٨٥ (٦) باڵەفرێن سیخۆرێت ڕژێما بعسا گۆڕ ب گۆڕ ئۆردگەهـێ ئاوارا ل زێوەی بۆمباران كر كو هێشتا هندەك خەلك دخەوودابوون و قوتابی ژی چووبوون باوەرنامێت خۆ ل قوتابخانێ وەرگرن چ دیمەنەكێ دلتەزێنە چ وێنەیەكێ ناخ هەژینە، دەست و سەر و قەلەم و دەفتەر و پیرو ژن و زارووك و گەنج لاشێن وان پارچە پارچە بوون و پتر ١٥٠ كەسان شەهـید بوون و پتری ٣٠٠ كەسان ژی بریندار بوون.
دوژمنی وەسا هزر دكر ب ڤان كریارێن ترسنوكانە و دوویر ل عرف و قیەم و ئەخلاقەكی دێ شێت ئیرادا قەهرەمانێت پارتی و بارزانی لاواز كەت لێ نەزانی دێ بەرخۆدان و فیداكاری و قوربانی سەركەفتن و پێشڤەچوون بەرەف سەرفەرازیێ دێ مەزنتر و بەرفرەهـتر بن
جەنابێ سەرۆک مەسعود بارزانی هاتە ناف كەس و كارێن شەهـید و بریندارا خەم و كۆڤانا خۆ دەربڕی و ڕۆندك بۆ باراندن لێ كەس و كارێن قوربانیان و شێرە ژنەكێ كو چار زارووكێن وێ شەهـید ببون گۆوتە جەنابێ سەرۆک مەسعود بارزانی ئەڤێ رێبازا پیرۆز قوربانی دڤێت خۆگوریكرن دڤێت و من دوو كوڕێت مای دێ وان ژی گوری كورد و كوردستانێ و ڕێبازا پیرۆزا پارتی و بارزانی كەم.
میللەتەكی، پارتەكێ، ڕێبازەكێ ئەف میللەتە هـەبیت بڤێ ئیرادا مەزن و پیڵایی ئەف دڵسۆز و فیداكار هەبن چ جارا ناشكێت و هەمی بەربەستا دێ شكێنن و دێ گەردەنا ڕۆژا ئازادیێ و سەربەستیێ ماچی كەت،خۆینا وان بێ تاوانا و هەمی شەهـید و ئەنفالكریا و مێرانیا پێشمەرگێن قەهرەمان و خۆڕاگریا خەلكێ مە بوونە پر و گەمی بۆ كاروانێ سەربڵندیێ و خوینا وان بۆ خەنا بۆ دەست و پێت شەنگە بویكا ئازادیێ.
سڵاڤ بۆ گیانێ بڵند و پیرۆزێ شەهـیدێن ئوردگەهێ زێوەی و تەڤایا شەهیدا و سەروەرێ وان بارزانیێ نەمر و ئیدریسێ جوانە مەرگ
سڵاڤ بۆ پێشمەرگێن قەهرەمان و خۆڕاگریا خەلكێ مە ل ئاوارەیێ و دەربەدەریێ، بهارا ١٩٩١ بەرسڤا دوژمنی داڤە و كۆچك و دیوانێت زوڵم و زووریێ هەرفاندن و دەنگێ سەرهەڵدان ژیانە، بەرخوەدان ژیانە سەرتاسەری كوردستانێ ڤەگرت و گیانێ پیرۆزێ شەهـیدا شاد بوو و كوردستان ژی هەر ئاڤەدان بیت و میللەت ژی بەختەوەر و سەركەفتن ژی هەر و هەر بۆ پارتی و رێبازا پیڕۆزا بارزانیە...