هێشو دارا

لە ماوەی ساڵانی ڕابردوودا، بەهۆی دیدگای پێشکەوتنخوازی سەرکردایەتیی سیاسیی کوردستان و خەباتی بەردەوامی ڕێکخراوەیی، ئافرەتانی كوردستان توانیویانە پێگەیەكی هاوسەنگ و گرنگ لە ژیانی سیاسی، کارگێڕی و كۆمەڵایەتیی هەرێمی كوردستاندا بەدەستبهێنن. بەڵام قۆناغی داهاتووی گەشەسەندنی قەوارەی هەرێمی کوردستان، پێویستی بە هەنگاوی ستراتیژیی زیاتر هەیە بۆ ئەوەی خانمان بە شێوەیەكی ڕاستەقینەتر ببنە بەشێكی بڕیاردەر لە لوتکەی حوكمڕانیدا.

دیدگای ئێمە بۆ داهاتووی پێگەی ئافرەتی کورد، لەسەر بنەمای هێز و شایستەیی ڕاوەستاوە، ئامانج ئەوەیە خانمان بتوانن بە ئازادی و لێهاتوویی خۆیان، لە سەرجەم ئاستەكانی دەسەڵات و دامەزراوە نیشتمانییەكاندا بەشدار بن. ئافرەتانی كورد لە بوارەکانی وەزارەت، پەرلەمان، پێگەی دیپلۆماسی، میدیا و چالاكیی مەدەنی و یاساییدا، نموونەیەكی سەرکەوتووی کادیری لێهاتوویان پێشکەش کردووە، بەڵام هێشتا بەربەستە كۆمەڵایەتی و ڕۆشنبیرییەكان لەپاڵ نادادپەروەری لە ڕەخساندنی دەرفەتەکاندا، وەک کۆسپ لەبەردەم فراوانبوونی ئەم پێگەیەدا دەبینرێن.

بۆ ڕەخساندنی ژینگەیه‌كی گونجاوتر، ئەرکە لەسەر سەرجەم لایەنە پەیوەندیدارەکان، لە حكوومەت و پەرلەمانەوە تا ڕێكخراوەكانی كۆمەڵگەی مەدەنی و میدیا، پێکەوە کار بکەن. بۆ ئەم مەبەستەش، ئەم پێشنیارە بنەڕەتییانە دەبنە نەخشەڕێگەی کایەکە، زیادكردنی ڕێژەی خانمان لە پۆستە بڕیاردەر و سیادییەكاندا بەپێی بنەمای لێهاتوویی و پسپۆڕی، دابینكردنی بەرنامەی خولیی فێركاری و ڕاهێنانی سەرکردایەتی بۆ پێگەیاندنی نەوەیەکی نوێ لە سەرکردەی ئافرەت، بەهێزکردنی پاڵپشتییە یاسایی و دادوەرییەکان بۆ پاراستنی ماف و ئازادییەكانی خانمان لە گشت کایەکاندا و هاندان و پشتگیریی میدیا بۆ نیشاندانی ڕۆڵی ئەرێنیی ئافرەت لە حوكمڕانیدا و ڕووبەڕووبوونەوەی ئەو بیرکردنەوە نەرێنییانەی دژ بە بەشداریی سیاسیی ژنانن.

لە کۆتاییدا دەبێت بڵێین، ئاییندەی گەش و دیموکراتیی هەرێمی كوردستان بەبێ بەشداریی كاریگەری خانمان هەرگیز تەواو نابێت. بەهێزكردنی پێگەی ئافرەت، تەنها پشتگیرییەک نییە بۆ ڕەگەزێک، بەڵکو پێداویستییەکی نیشتمانی و هەنگاوێكی مێژووییە بۆ بنیادنانی كۆمەڵگەیەكی دادپەروەر، هاوچەرخ و پێشكەوتوو.