هەولێر-KDP.info- بەرپرسی دەستەی کارگێڕیی مەکتەبی سیاسیی پارتی دیموکراتی کوردستان پێشوازیی لە شاندێکی باڵای کۆمەڵی دادگەریی کوردستان کرد و، لە دیدارەکەدا هەردوولا جەختیان لە هەماهەنگیی نێوانیان کردەوە و هاوڕابوون لەسەر پێویستیی هاوهەڵوێستیی سەرجەم پارت و هێزە سیاسییەکان لە پێناو پاراستن و بەهێزترکردنی قەوارەی سیاسی و دەستووریی هەرێمی کوردستان و کاراکردنەوەی دامەزراوەکان.
ئەمڕۆ، چوارشەممە ڕێکەوتی ٢٠ی ئایاری ٢٠٢٦، شاندێکی باڵای کۆمەڵی دادگەریی کوردستان، سەردانی مەکتەبی سیاسیی پارتی دیموکراتی کوردستانی لە پیرمام کرد و لە لایەن فازڵ میرانی، بەرپرسی دەستەی کارگێڕ و ئەندامانی دەستەی کارگێڕیی مەکتەبی سیاسیی پارتی، پێشوازییان لێ کرا.
لە دیدارەکەدا، کە هەڤاڵان (ئازاد بەرواری، سیداد بارزانی، مەحمود محەمەد) ئەندامانی دەستەی کارگێڕ و (د. کەمال کەرکوکی، زاگرۆس فەتاح) ئەندامانی مەکتەبی سیاسی ئامادەی بوون، فازڵ میرانی وێڕای بەخێرهێنانی شاندی میوان، سوپاسی کردن بۆ ئەو دەستپێشخەری و سەردانەیان و جەختی لە گرنگیی بەهێزکردنی پەیوەندییەکانی نێوان هەردوولا و سەرجەم هێز و لایەنە سیاسییەکانی دیکە کردەوە و ئاماژەی دا کە کوردستان کۆکەرەوەی هەموومانە، ڕابردووی هاوبەش و ئێستا و ئایندەی هاوبەشیشمان دەبێت، بۆیە وێڕای جیاوازییەکانی نێوانمان، پێکەوەیی و گفتوگۆ و بەردەوامیی پەیوەندییەکان پێویستن.
لە بەرامبەردا عەبدولستار مەجید، سەرۆکی شاند و ئەندامی مەکتەبی سیاسیی کۆمەڵی دادگەری، خۆشحاڵیی خۆی دەربڕی بۆ ئەو پێشوازییە گەرمەی کە لێیان کراوە و سڵاوی بەڕێز مامۆستا عەلی باپیر، سەرۆکی کۆمەڵی دادگەریی بە مەکتەبی سیاسی و جەنابی سەرۆک بارزانی ڕاگەیاند و جەختی لەوە کردەوە کە هەرێمی کوردستان وەکو چۆن ماڵی هەمووانە، پاراستن و پێشخستنیشی ئەرکی هەموو لایەکە، بەتایبەت لەو بارودۆخەی کە ناوچەکە و عێراقی پێدا تێدەپەڕێت، بۆ ئەمەش گفتوگۆ و پەیوەندیی بەردەوام پێویستە لە هەموو ئاستەکانی پارتە سیاسییەکان و دامەزراوەکانی هەرێمی کوردستان.
لە کۆتاییدا، هەردوولا جەختیان لە هەماهەنگیی نێوانیان کردەوە و هاوڕابوون لەسەر پێویستیی هاوهەڵوێستیی سەرجەم پارت و هێزە سیاسییەکان لە پێناو پاراستن و بەهێزترکردنی قەوارەی سیاسی و دەستووریی هەرێمی کوردستان و کاراکردنەوەی دامەزراوەکان، هەروەها پەرلەمان و حکوومەتێکی کارا بە گرنگ و پێویست زانرا بۆ خزمەتی هاووڵاتیان و هێنانەدیی ئامانجە باڵاکانی گەلەکەمان.
شایەنی ئاماژەیە، شاندی کۆمەڵی دادگەریی کوردستان پێکهاتبوو لەم بەڕێزانە: عەبدولستار مەجید، سەرۆکی شاند؛ هەروەها محەمەد حەکیم، ڕێبوار حەمەد، ئەنوەر سەنگاوی، ئیدریس سادق - ئەندامانی شاند و ئەندامانی مەکتەبی سیاسیی کۆمەڵی دادگەریی کوردستان.