هەولێر-KDP.info- سکرتێری یەکێتیی ئافرەتانی کوردستان بە گەرمی پێشوازی لە خاتوو (فەزیلە) ڕزگاربووی شاڵاوی ئەنفال دەکات، کە بە ئازایەتیی خۆی بووە هۆی ناسینەوە و دەستگیرکردنی جەلادەکەی نوگرە سەلمان (عەجاج).
ئەمڕۆ یەکشەممە ١٧ـی ٥ـی ٢٠٢٦، زیبا تەها، سکرتێری یەکێتیی ئافرەتانی کوردستان، لەگەڵ ئەندامانی مەکتەبی سکرتاریەت، بەگەرمی و بە چەپکە گوڵەوە پێشوازییان لە خاتوو (فەزیلە) کرد، ئەو ئافرەتە خۆڕاگرەی بە ئیرادە بەهێزەکەی بووە دەنگی قوربانیانی ئەنفال و فاکتەری سەرەکیی ئاشکراکردنی تاوانبار (عەجاج) جەلادی زیندانی نوگرە سەلمان.
لە دیدارەکەدا، زیبا تەها وێڕای بەخێرهاتن، سوپاسی نیشتمانپەروەریی خاتوو فەزیلەی کرد و جەختی لەسەر ڕۆڵی مێژوویی ئەو کردەوە و ڕایگەیاند، ''دادپەروەری بە ئازایەتی و دەنگی قوربانیان بەدی دێت، جەنابتان بوونە بەرزترین نموونە بۆ سەلماندنی ئەم بنەمایە.
لای خۆشیەوە، خاتوو (فەزیلە) خۆشحاڵیی خۆی بەو پێشوازی و ڕێزلێنانە دەربڕی و ئاماژەی بە ئەزموونی ژیانی سەختی خۆی، ئازارەکانی زیندانیانی نوگرە سەلمان و چۆنیەتیی ڕۆڵی لە دۆزینەوە و ئاشکراکردنی ئەو تاوانبارە دڕندەیەدا کرد.
لەکۆتاییدا، سکرتێری یەکێتیی ئافرەتانی کوردستان مژدەی ئەوەی پێدا کە لە داهاتوویەکی نزیکدا، مەراسیمێکی شایستەی ڕێزلێنان بۆ خاتوو فەزیلە و هەموو ئەو ئافرەتە قارەمانانە ڕێک دەخەن کە لە پرۆسەی دادگاییکردنی تاوانبار (عەجاج)ـدا گەواهییان دا، تاوەکو دادپەروەری دەرهەق بەو جەلادە جێبەجێ بکرێت.
