هەولێر-KDP.info- ئەمڕۆ دووشەممە، لە سەلاحەدین، دکتۆر هێمن هەورامی، ئەندامی مەکتەبی سیاسی و بەرپرسی بەشی ڕێکخستنی پارتی دیموکراتی کوردستان، پێشوازی لە ئەدریان ئایسڵستاین، کونسوڵی گشتیی هۆڵەندا لە هەرێمی کوردستان کرد.
لە دیدارەکەدا، بیروڕا لەبارەی دوایین پێشهاتە سیاسییەکانی عێراق و گفتوگۆکانی تایبەت بە پێکهێنانی حکوومەتی فیدراڵی ئاڵوگۆڕ کرا.
دکتۆر هێمن هەورامی، دوایین هەڵوێست و بۆچوونە فەرمییەکانی پارتی دیموکراتی کوردستانی بۆ شاندی میوان ڕوون کردەوە.
تەوەرە سەرەکییەکانی کۆبوونەوەکە بریتیبوون لەجەختکردنەوە لەسەر پێویستی جێبەجێکردنی تەواوی بڕگە دەستوورییەکان وەک بنەمای سەرەکی بۆ چارەسەری کێشەکان و پاراستن و ڕێزگرتن لە فیدراڵیەت و مافە دەستوورییەکانی هەرێمی کوردستان.
دکتۆر هێمن هەورامی ئاماژەی بەوە کرد کە پارتی جەخت لەسەر چەسپاندنی پرەنسیپەکانی (سازان، هاوسەنگی و هاوبەشی) دەکاتەوە لە پڕۆسەی سیاسی و بەڕێوەبردنی حکوومەتی داهاتوودا.
لە کۆتایی دیدارەکەدا، هەردوولا گرینگی بەردەوامی پەیوەندییەکانی نێوان هەرێمی کوردستان و هۆڵەندایان بەرز نرخاند لەپێناو سەقامگیری زیاتری ناوچەکە.