هەولێر-KDP.info- پەرەپێدانی پەیوەندییە مێژووییەکانی نێوان کۆماری میسری عەرەبی و هەرێمی کوردستان و دوایین گۆڕانکارییە سیاسییەکانی ناوچەکە، تەوەرەی سەرەکی دیداری نێوان بەرپرسی بەشی ڕێکخستنی پارتی و کونسوڵی گشتیی میسر بوون.
ئەمڕۆ سێشەممە ٢٨ـی نیسانی ٢٠٢٦، د. هێمن هەورامی، ئەندامی مەکتەبی سیاسی و بەرپرسی بەشی ڕێکخستنی پارتی دیموکراتی کوردستان، پێشوازی لە مەحموود فاروق عامر، کونسوڵی گشتیی میسر لە هەرێمی کوردستان کرد.
لە دیدارەکەدا جەخت لەسەر پتەوکردنی زیاتری پەیوەندییە دێرینەکانی نێوان گەلی میسر و گەلی کوردستان کرایەوە و ئارەزووی هەردوولا بۆ فراوانکردنی هەماهەنگییەکان لە بوارە جیاجیاکاندا دەربڕدرا و بیروڕا لەسەر دوایین پێشهات و گۆڕانکارییەکانی ناوچەکە ئاڵوگۆڕ کرا. لەم چوارچێوەیەدا، د. هێمن هەورامی ڕوانگە و ستراتیژی پارتی دیموکراتی کوردستانی سەبارەت بە پرسە سیاسییەکان و چۆنیەتی مامەڵەکردن لەگەڵ تەحەددییەکانی ئێستای عێراق و ناوچەکە بۆ کونسوڵی میسر ڕوون کردەوە.
هەردوولا هاوڕابوون لەسەر گرینگی دیالۆگ و لێکتێگەیشتن بۆ پاراستنی سەقامگیری و گەیشتن بە چارەسەری گونجاو بۆ ئەو دۆخانەی کە ڕووبەڕووی ناوچەکە دەبنەوە.