هەولێر- KDP.info- پارێزگاری هەولێر ڕایگەیاند؛ بەبۆنەی ساڵیادی ئازادکردنی شەقڵاوە، زەوی بەسەر فەرمانبەران، پێشمەرگە و ئاسایش لەو دەڤەرەدا دابەش کرا.
ئومێد خۆشناو، پارێزگاری هەولێر ڕایگەیاند کە لەژێر ڕاسپاردە و فەرمانی ڕێزدار مەسرور بارزانی، سەرۆکی حکومەتی هەرێمی کوردستان و لە درێژەی پرۆسەی دابەشکردنی زەوی بەسەر فەرمانبەران، پرۆسەی دابەشکردنی زەوی بەسەر فەرمانبەرانی حکومەتی هەرێمی کوردستان لە ڕاژەی شارستانی، پێشمەرگە، ئاسایش و هێزە ئەمنییەکاندا بەردەوامە.
ئەمڕۆ دووشەممە 2026.3.9، هاوکات لەگەڵ یادی ئازادکردنی شاری شەقڵاوە، بەسەرپەرشتی ساسان عەونی، وەزیری شارەوانی و پارێزگاری هەولێر و بە ئامادەبوونی بەڕێوەبەری گشتیی شارەوانییەکانی هەولێر و سەرۆکی شارەوانیی شەقڵاوە، تیروپشک بۆ (٢ هەزار و ٥٨٥) پارچە زەوی دیکە لە سنووری سەرۆکایەتیی شارەوانیی شەقڵاوە بۆ فەرمانبەرانی ڕاژەی شارستانی، پێشمەرگە و ئاسایش کرا.
"لە ڕێوڕەسمەکەدا، هەریەک لە وەزیری شارەوانی و پارێزگاری هەولێر ئاماژەیان بەوە دا، کە ئەمڕۆ لە یادی ٣٥ ساڵەی ڕاپەڕینی خەڵکی کوردستان و شەقڵاوە، پرۆسەی دابەشکردنی زەوی بەسەر سەرجەم فەرمانبەرانی شەقڵاوە ڕادەگەیەنین" و پیرۆزباییان لە فەرمانبەرانی سوودمەندبوو کرد.
تا ئێستا لە سنووری بەڕێوەبەرایەتیی گشتیی شارەوانییەکانی هەولێر (سەرۆکایەتییەکانی شارەوانی لە دەوروبەری هەولێر) زیاتر لە (٣٢ هەزار) پارچە زەوی دابەش کراوە، لە سنووری شارەوانییەکانی بنەسڵاوە، بەحرکە، دارەتوو، دارەشەکران، ڕزگاری، سێبیران، شە مامک، قوشتەپە، کەسنەزان، کەورگۆسک، مەخموور، دیبەگە-قەراج و کانی قڕژاڵە، پڕۆسەکەش بەردەوامە.
پارێزگاری هەولێر سوپاسی وەزیری شارەوانیی کرد و دەستخۆشی لە بەڕێوەبەری گشتیی شارەوانییەکانی هەولێر، بەڕێوەبەری نەخشەدانانی ئاوەدانیی هەولێر، سەرجەم تیمەکان، قایمقام، بەڕێوەبەرانی ناحیە و سەرۆک شارەوانییەکان کرد، کە زۆر بە باشی کاریان لەو پرۆسەیەدا کردووە.
جێی باسە، ڕۆژی ٢٧ی ئاداری ٢٠٢٤، لەسەر ڕاسپاردە و فەرمانی ڕێزدار مەسرور بارزانی، سەرۆکی حکومەتی هەرێمی کوردستان، ئەنجومەنی وەزیرانی هەرێمی کوردستان چەندین بڕیاری لە بەرژەوەندیی دۆخی هاووڵاتییانی کوردستاندا دا؛ یەکێک لەو بڕیارانە بەخشینی ٢٠٠ مەتر زەوی بوو بە فەرمانبەرانی کەرتی گشتی بەپێی مەرج و ڕێنماییەکان، لەو چوارچێوەیەشدا تاوەکو ئێستا پرۆسەکە بەردەوامە.