ھەولێر-KDP.info- زانکۆی سەلاحەدین پلانێکی ستراتیژی ڕادەگەیەنێت و بەپێی پڕۆژەکە تا کۆتایی ساڵی ٢٠٢٦، تەواوی کاروبارە کارگێڕی و زانستییەکانی زانکۆکە دەبنە ئەلکترۆنی.
سامان عەبدوڵڵا، بەڕێوەبەری ڕاگەیاندنی زانکۆی سەلاحەدین، لە لێدوانێکی تایبەتدا بۆ ماڵپەڕی فەرمیی پارتی دیموکراتی کوردستان ڕایگەیاند: "پاڵپشت بە کارنامەی کابینەی نۆیەمی حکوومەتی ھەرێمی کوردستان و لەسەر ڕاسپاردەی (پ.د. کامەران یونس محەمەدئەمین) سەرۆکی زانکۆی سەلاحەدین، لە ماوەی چوار ساڵی ڕابردوودا توانراوە بەشێکی زۆر لە کاروبارەکان بکرێنە ئەلکترۆنی."
بەڕێوەبەری ڕاگەیاندن ئاماژەی بەوەش کرد، لە ئێستادا سەرجەم تیمە تەکنیکییەکان و لایەنە پەیوەندیدارەکانی زانکۆ ھەوڵەکانیان چڕ کردووەتەوە تا پڕۆسەکە بگەیەننە قۆناغی کۆتایی.
هەروەها گوتیشی: "ئامانجمان ئەوەیە تا کۆتایی ساڵی ٢٠٢٦، ھیچ مامەڵەیەک لە دەرەوەی سیستەمی ئەلکترۆنی نەمێنێت و ھەموو ڕێکارەکان بە دیجیتاڵی بەڕێوەبچن، ئەمەش لەپێناو خێراکردنی کارەکان و کەمکردنەوەی ڕۆتین لەبەردەم مامۆستایان و خوێندکاران."
بڵند ئیبراھیم