ھەولێر-KDP.info- نوێنەری حکوومەتی ھەرێمی کوردستان لە فەرماندەی ئۆپەڕاسیۆنی ھاوبەشی عێراق زانیاری گرینگ سەبارەت بە ھێرشی سەر کێڵگەی کۆرمۆر و دابینکردنی سیستەمی بەرگری بۆ ماڵپەڕی KDP باس دەکات، ھاوکات باس لەو ڕاپۆرتەش دەکات کە لیژنەکە ئامادەی کردووە.
لیوا فایەق ئەنوەر مزووری، نوێنەری حکوومەتی ھەرێمی کوردستان لە فەرماندەی ئۆپەڕاسیۆنی ھاوبەشی عێراق، لە لێدوانێکیدا سەبارەت بە دانانی سیستەمی بەرگری بۆ کێڵگەی کۆرمۆر بە ماڵپەڕی فەرمیی پارتی دیموکراتی کوردستانی ڕاگەیاند، زۆر گرنگە سیستەمی بەرگری بۆ کێڵگەی کۆرمۆر دابین بکرێت، نەک بۆ کۆرمۆر بەڵکو بۆ ھەموو عێراق گرنگە نەک تەنھا ھەرێمی کوردستان، لە ئێستا بەردەوام ھەوڵی دابینکردنی ئەو سیستەمە دەدرێت لەلایەن حکوومەتی ھەرێمی کوردستان لەگەڵ بەغدا و ھاوپەیمانانیش پشتگیری لە دابینکردنی دەکەن.
ناوبراو ئەوەش ناشارێتەوە کە سیستەمی بەرگری عێراقیش توانای گەڕاندنەوەی درۆن و مووشەکی نیە، واتا تەنھا توانای گەڕاندنەوەی لە پێنچ کیلۆمەتر ھەیە و پێشکەوتووش نیە، بۆیە ھەوڵدەدرێت سیستەمێکی پێشکەوتوو دابین بکرێت کە توانای بەرگریکردن لەو کێڵگەی ھەبێت.
لیوا فایەق مزووری جەختیش دەکاتەوە، کە حکوومەتی ھەرێمی کوردستان سوورە لەسەر ئەوەی سیستەمی بەرگری بۆ کێڵگەی کۆرمۆر دابین بکرێت، لەبەر ئەوەی بە دابینکردنی سیستەمی بەرگری ئیدی کۆتایی بە کێشەی ھێرشی بەردەوام دێت بۆ سەر ئەو کێڵگەیە و چەند جاریشە ھێرش دەکرێت لێکۆڵینەوەش دەکرێت بێ ئەنجام دەبێت، بۆیە ئەمجارەش باس لەوەکرا کە لە ماوەی ٤٨ کاتژمێردا ئەنجامەکان ڕادەگەیەنین و ئێستا ڕاپۆرتیش ئامادەکراوە و ھێشتا ڕایاننەگەیاندووە.
سەبارەت بە زانیاریەکانی ڕاپۆرتەکەش، مزووری دەڵێت، زانیاریمان ھەیە لە ڕاپۆرتەکەدا باسی ئەو لایەنە نەکراوە کە ھێرشەکەی ئەنجامداوە، کە دیاریشە کێن ئەوانەی ھێرشیان کردووە و ناوەکانیان کێن، بۆیە پێویستە سیستەمەکە بۆ ھەرێم دابین بکرێت و ھەرێم خۆی بەڕێوەی ببات بۆ ئەوەی بتوانێت بەرگری لێ بکات و چیتر ھێرشی سەر کۆرمۆر نەکرێت.
بڵند ئیبراھیم