سلێمانی-KDP.info- عەلی حوسێن، ئەندامی مەكتەبی سیاسی و بەرپرسی مەكتەبی ڕێكخستنی پارێزگای سلێمانی - هەڵەبجە - ڕاپەڕینی پارتی دیموکراتی کوردستان رایدەگەیەنێت، داهاتی سلێمانی بۆ خزمەتی خەڵكی خۆشەویستی ئەم شارە بەكار ناهێندرێت، لە کاتێکدا دەبێت هەمووان بەرژەوەندیی گشتی بپارێزین، کە ئەوەش تەنیا بە پارتی و سەرۆك بارزانی دەكرێت.

لە درێژەی چالاكییەكانی هەڵمەتی بانگەشەی هەڵبژاردن بۆ سەرخستنی لیستی (275)ی پارتی دیموكراتی كوردستان، ئەمڕۆ سێشەممە بە سەرپەرشتیی (عەلی حوســـێن) ئەندامی مەكتەبی سیاسی و بەرپرسی مەكتەبی ڕێكخستنی پارێزگای سلێمانی - هەڵەبجە - ڕاپەڕین و بە ئامادەبوونی هەڤاڵانی مەكتەب، كۆبوونەوەیەكی فراوان لەگەڵ هەڤاڵانی هێزەكانی ناوخۆ و زێرەڤانی لە سلێمانی بەڕێوەچوو.

لە دەستپێكی كۆبوونەوەكەدا، عەلی حوسێن گوتەیەكی پێشكەش كرد و رایگەیاند، ئێستا لە كۆتاییەكانی هەڵمەتی بانگەشەی هەڵبژاردنین، بانگەشە لە سەرەتادا بە باشی بەڕێوە دەچوو، چونكە پەیامی سەرۆك بارزانی و سەركردایەتیی پارتی، پەیامی ئاشتی و نەرمونیانی بوو، بەڵام بەداخەوە دوای كەرنەڤاڵە جەماوەرییە پڕ جۆش و حەماسەتەكەی ئاپۆرای پشتگیریی جەماوەری سلێمانی و دەوروبەری بۆ لیستی 275، دیارە ئەم برادەرانە چاویان بەوە هەڵنەهات، بۆیە بە بەرنامە لە زۆربەی هەرە زۆری شوێنەكانی سلێمانی و دەوروبەری پۆستەر و درووشمەکانی كاندیدان و لیستی 275 لێكرانەوە و شێوێندران، بەڵام ئێمە هەر پابەندین بە بڕیار و ڕێنماییەكانی سەرۆك و سەركردایەتی و بەردەوام دەبین لە بانگەشەی نەرم و هێمنانە.

لە بەشێكی دیکەی قسەكانیدا، عەلی حوسێن هێمای بۆ جۆری بانگەشە كرد و گوتی، پەیامی پارتی دیموكراتی كوردستان دەنگی بەرز و هاتوهاوار نییە، پەیامی سەرۆك بارزانی و پارتی، پەیامی خزمەتگوزاری و ئاوەدانییە، پەیامی خەباتە، ئەگەر سەیر بكەین لە ناوچەكە و عێراق و جیهانیش حیزبی 80 ساڵ تەمەن نەماوە، ئەگەر مابێش زۆر لاواز و نادیارە، بەڵام سەیر بكەن پارتی دیموكراتی كوردستان 80 ساڵ تەمەنیەتی هەر یەكەمە و هەر بە یەكەمی دەمێنێتەوە، ئەوەش هۆكارەكەی ڕوونە، كە پارتی لە خەمی خاك و خەڵكدایە، بۆیە خەڵك پشتیوانیەتی و پشتگیری دەكەن، هەمووانیش باش دەزانن پارتی چۆن لە خەبات پێشەنگ بووە، لە ئاوەدانی و خزمەتگوزاریش هەر پێشەنگە، پارتی هەڵگری پەیامی نەتەوەییە، بۆیە هەر بە گەورەیی دەمێنێتەوە.

عەلی حوسێن، لە بەشێكی تری قسەكانیدا باسی بارودۆخی ئیدارەی سنووری سلێمانی كرد و گوتی: داهات و بودجەی ئەم سنوورە، لە سنووری ژێر دەساڵات و ئیدارەی پارتی زۆرتر نەبێت، كەمتر نییە، بەڵام بە ڕاستی كەس نازانێت داهاتی ئیداری ئێرە چی لێدێت و بۆچی سەرف دەكرێت، بۆیە پارتی دیموكراتی كوردستان پێداگرە لەسەر پێكهێنانی حكوومەتێكی سەرتاسەری، تا داهات لە یەك شوێن و دەستێكی ئەمیندا كۆ بكرێتەوە و بۆ خزمەتی هاووڵاتیان بەكار بهێندرێت، بەڕاستی داهاتی سلێمانی بۆ خزمەتی خەڵكی خۆشەویستی ئەم شارە بەكار ناهێندرێت، بۆیە ئێمە ڕوو لە خەڵكی خۆشەویست و تێكۆشەر و ڕۆشنبیری سلێمانی و دەوروبەری دەكەین و دەڵێین: لە ماوەی 30 ساڵی ڕابردوودا زۆر خەڵك و لایەنتان تاقی كردەوە و دەنگتان پێدان خزمەتیان نەكردن، ئەمجارە لیستی 275 و پارتی دیموكراتی كوردستان تاقی بكەنەوە و دەنگ بە حەق و بە مافی خۆتان بدەن، دواتر ئەنجامەكەی ببینن و بزانن کە پارتی چیتان بۆ دەكات لە خزمەتگوزاری و ئاوەدانی.

لە دوابەشی قسەكانیدا، عەلی حوسێن باسی لە مێژووی پڕ سەروەریی پارتی كرد و رایگەیاند، لەگەڵ ئەو هەموو پیلان و ڕێگری و كۆسپانەی بۆ پارتی دیموكراتی كوردستان دروست دەكرێن، بەڵام بە حیكمەتی سەرۆك بارزانی، پارتی لەسەر ئاستی ناوخۆیی و ناوچەیی و نێودەوڵەتیش هەر پێشەنگە و حساب بۆكراوە، ئەگەر سەیری یاسای هەڵبژاردنی ئەمجارە بكەین، لە بەرژەوەندیی خۆیان دایانڕشتووە، لە كوردستان كاندید بە 30 هەزار دەنگ دەردەچێت، لای خۆیان بە دوو سێ هەزار، لەگەڵ ئەوەش هەر پارتی یەكەمە و هیچ حیزبێك بێ هاوپەیمانی ئەوەندەی پارتی دەنگ ناهێنێت، بۆیە دەبێت هەمووان بەرژەوەندیی گشتی لە بەرچاو بگرین و بیپارێزین، ئەوەش تەنیا بە پارتی و سەرۆك بارزانی دەكرێت، بۆیە دەبێت هەمووان پشتیوانی لیستی 275 بین.