ھەولێر-KDP.info- بەرپرسی نووسینگەی کاروباری کوردانی فەیلی ڕایدەگەیەنێت، دوای کردنەوەی سەنتەری بەدواداچوونی کێشەکانی کوردانی فەیلی، دەستەیەک دامەزراوە و بڕیارە دەستەکە فراوان بکرێت و لقی تازەش لە شارەکان بکرێنەوە. دەشڵێ، بڕیارە لە قۆناغی یەکەمیشدا بەدواداچوون بۆ رووفاتی شەھیدانی کوردی فەیلی بکرێت.
عەلی فەیلی، بەرپرسی نووسینگەی کاروباری کوردانی فەیلی، بۆ ماڵپەڕی فەرمیی پارتی دیموکراتی کوردستان گوتی، "لەسەر راسپاردەی سەرۆک بارزانی سەنتەرێکی تایبەت بە بەدواداچوون بۆ کاروباری کوردانی فەیلی لە ھەولێر کراوەتەوە و ستافێکی حەوت کەسیی بۆ دانراوە، کە بڕیارە دەستەکە فراوان بکرێت و کەسانی دیکەی بۆ زیاد بکرێت، دەستەکەی ئێستاش دەبنە راوێژکاری، کە لە ئێستادا ئەو سەنتەرە دەستی بە کار کردووە و بارەگایەکی زۆر گەورەیان بۆ دابین کراوە لە ھەولێر، بڕیارە لە قۆناغی یەکەمیشدا بەدواداچوون بۆ رووفاتی شەھیدانی کوردی فەیلی بکرێت، کە بێسەروشوێنن و ژمارەیان ١٢ ھەزار کوردی فەیلییە کە لە ساڵی ١٩٨٠ لە زیندان بوون و دڵنیاین ئێستا لە ژیاندا نەماون و دەمانەوێت رووفاتەکان بدۆزینەوە.
عەلی فەیلی گوتیشی، "٢٦٣ خێزانی فەیلی ٤٥ ساڵە لە ئێرانن لە کەمپدا و پێویستە ئەوانیش بگەڕێنەوە و کێشەی ناسنامە و سەروەت و سامانی کوردانی فەیلیش چارە بکرێت، کە ١٠٠ ھەزار خانوو و شوێنی بازرگانی تا ئێستا بۆ کوردانی فەیلی نەگەڕاونەتەوە، کە لە ساڵی ١٩٨٠دا ٦٠٠ ھەزار کوردی فەیلی دەربەدەر کران لە عێراق و موڵکەکان کڕین و فرۆشتنیان پێوە دەکرێت و تا ئێستا حکوومەتی عێراق ھیچی بۆ نەکردوون و قەرەبووشی نەکردوونەتەوە.
ناوبراو ڕوونیشی کردەوە، "بڕیارە جگە لە کردنەوەی سەنتەری بەدواداچوونی کوردانی فەیلی، لقی ئەو سەنتەرە لە شارەکانی دیکەش بەپێی پێویست بکرێتەوە، چونکە حکوومەتی عێراق ھیچی بۆ کوردانی فەیلی نەکردووە.
دەشڵێ، سەرۆک بارزانی لە کۆنفرانسی جینۆسایدی کوردانی فەیلی بڕیاری دا ئەو سەنتەرە لەلایەن حکوومەتی ھەرێمی کوردستانەوە بکرێتەوە، کە ئێستا ئەنجوومەنی وەزیران خۆی سەرپەرشتی دەکات و بڕیاریشە لە مەراسیمێکی شایستەدا بە ئامادەبوونی بەرپرسانی باڵا بە فەرمی بکرێتەوە، چونکە ئێستا سەنتەرەکە کاری خۆی دەکات و بەردەوامیش دەبێت، کە حکوومەتی ھەرێمی کوردستان بە ماددی و مەعنەوی پاڵپشتیی ئەو سەنتەرە دەکات، بۆیە ئەمە ھەنگاوێکی گرینگە و خەمخۆریی سەرۆک بارزانی و حکوومەتی ھەرێمی کوردستان بۆ چارەسەری کێشەکانی کوردانی فەیلی دەردەخات، لەبەر ئەوەی ھەرێمی کوردستان گرینگی بە ھەموو پێکھاتە و نەتەوە و ئایینەکان بەبێ جیاوازی دەدات و ھەرێمی کوردستانیش شوێنی پێکەوەژیانە.
بڵند ئیبراھیم