ھەولێر-KDP.info- ئەمڕۆ سێشەممە ٢٠٢٥/٨/٥ بەڕێز نێچیرڤان بارزانی، سەرۆکی ھەرێمی کوردستان، کارگەی شیرەمەنیی زۆمی ـ ی بۆ بەرھەمەکانی شیری خۆماڵی لە سنووری قەزای مێرگەسۆر، بەسەرکردەوە.
سەرۆک نێچیرڤان بارزانی ستایشی بیرۆکە و دامەزراندنی کارگەکەی کرد و بۆ ئەم مەبەستە، دەستخۆشیی لە بەڕێز مەلامستەفا بارزانی کرد، ھەروەھا ھیوای سەرکەوتن و بەرەوپێشچوونی بەردەوامی بۆ پرۆژەکە و کارمەندانی خواست کە بە شێوەیەکی پیشەیییانەی سەرکەوتوو، کارەکانی پرۆژەکە و بەرھەمھێنان بەڕێوەدەبەن.
بەڕێزیان جەختی لەسەر ڕۆڵ و گرنگیی پرۆژەکە بۆ ڕەخساندنی دەرفەتی کار بۆ دانیشتوان و گوندنشینانی سنوورەکە و برەودان بە بواری ئاژەڵداری و کشتوکاڵ لە سنوورەکە و کوردستان و عێراق کردەوە، ھەروەھا پرۆژەکەی بە خزمەتێکی نیشتمانی لەقەڵەم دا.
لای خۆیەوە بەڕێز مەلامستەفا بارزانی خۆشحاڵیی خۆی بە سەردانی سەرۆک نێچیرڤان بارزانی دەربڕی و سوپاسی بەسەرکردنەوەکەی کرد، ھەروەھا جەختی لە برەودان بە پرۆژەکە کردەوە تا بتوانێت خزمەتی زیاتر بە دانیشتوانی ناوچەکە و بەرھەمی خۆماڵی بکات و ببێتە ھاندەرێک بۆ پێشخستنی بەرھەمھێنان و پیشەسازیی نیشتمانی.
