بارزان -KDP.info- ئه‌مڕۆ 42 ساڵ به‌سه‌ر تاوانی جینۆسایدی هه‌شت هه‌زار بارزانیدا تێدەپەڕێت، كوڕی یه‌كێك له شه‌هیدانی جینۆسایدی بارزانییەکان ده‌ڵێ "چونکە کوردبوون بۆیە زینده‌به‌چاڵ كران؟"
حازم بله‌یی، یه‌كێكه له‌و گه‌نجانه‌ی باوك، باپیر، مام و خاڵی له جینۆسایدی بارزانییه‌كان زیندەبەچاڵ کراون، به ماڵپه‌ڕی فه‌رمیی پارتی دیموكراتی كوردستانی ڕاگه‌یاند "ساڵانه كاتێك ده‌گه‌ینه 31ی ته‌مووز برینه‌كانمان ده‌كولێنەوه، چونكه له‌و ڕۆژه‌دا، ئازیزانمان له‌ده‌ستدا، به‌داخه‌وه ژماره‌یه‌ك له ئه‌ندامانی خێزانکەی ئێمه‌ش به‌ر جینۆسایدی بارزانییه‌كان كه‌وتن، له‌و یاده‌دا داوا له لایه‌نه سیاسیه‌كان ده‌كه‌ین یه‌كگرتووبن بۆ پاراستنی ده‌ستكه‌وته‌كانمان، چونكه ئه‌گه‌ر یه‌كگرتوو نه‌بین به ڕه‌نگ و شێوازێكی دیكه جینۆسایدمان ده‌كه‌نه‌وه."
شێرزاد سه‌لیم، باوكی له‌گه‌ڵ هه‌شت هه‌زار بارزانی جینۆساید كراوه، بۆ ماڵپه‌ڕی فه‌رمیی پارتی دیموكراتی كوردستان گوتی "تاوانێكی زۆر گه‌وره به‌رامبه‌ر به ئێمه‌ی بارزانی كراوه، تاوانی باوكم و هه‌زاران هاووڵاتی دیكه‌ی بارزانی ته‌نیا ئه‌وه‌بوو كوردبوون، ڕژێمی له‌ناوچووی به‌عس هه‌موو شتێكی ده‌دۆزیه‌وه بۆ ئه‌وه‌ی كورد جینۆساید بكات، تاوانی بارزانییه‌كان ته‌نیا كوردبوون بوو."
حه‌بیب عوبێد، هاووڵاتییه‌كی دیكه‌ی بارزانییه، بۆ ماڵپه‌ڕی فه‌رمیی پارتی دیموكراتی كوردستان گوتی "به‌داخه‌وه ڕۆژی 31ی ته‌مووزی 1983، ده‌ستی ڕه‌شی ڕژێم گه‌یشته باوك و دوو برام، له‌گه‌ڵ بارزانییه‌كان جینۆساید كران، ئێمه 42 ساڵه چاوه‌ڕێی گه‌ڕانه‌وه‌ی ڕوفاته‌كانیانین، ئه‌وه 42 ساڵه ئێمه ئازار ده‌کێشین، چونکە کوردبوون، بۆیە زیندەبەچاڵ کران".
قائید میرۆ