ھەولێر-KDP.info- ئەندامێکی لیژنەی بەرەنگاربوونەوەی ماددە ھۆشبەرەکان لە حکوومەتی ھەرێمی کوردستان دەڵێ، ڕێوشوێنەکان بۆ بەرەنگاربوونەوەی ماددە ھۆشبەرەکان توند کراون و دوو سەنتەری شیاندنیش دەکرێنەوە.
سەڵاح ئەنوەر، ئەندامی لیژنەی بەرەنگاربوونەوەی ماددە ھۆشبەرەکان لە حکوومەتی ھەرێمی کوردستان، بە ماڵپەڕی فەرمیی پارتی دیموکراتی کوردستانی ڕاگەیاند، بەپێی ئامارەکانی بەردەست، بەکارھێنان و بازرگانیکردن بە ماددەی ھۆشبەر زۆر زیادی کردووە و مەترسی لەسەر کۆمەڵگەی کوردستان دروست کردووە، بەڵام لەگەڵ ئەو زیادبوونەشدا لایەنە پەیوەندیدارەکان لە حکوومەتی ھەرێمی کوردستان، بەتایبەتی بەڕێوەبەرایەتیی ئاسایش بەردەوامە لە دەستبەسەرکردنی ئەو کەسانەی ماددەی ھۆشبەر بەکار دێنن یانیش بازرگانی پێوە دەکەن.
ئەندامەکەی لیژنەی بەرەنگاربوونەوەی ماددەی ھۆشبەر دەشڵێت، تا ئێستا ھەرچیەکی پێویست بێت بۆ بەرەنگاربوونەوەی ماددەی ھۆشبەر مەسروور بارزانی سەرۆکی حکوومەتی ھەرێمی کوردستان ئامادەیی خۆی پێشان داوە و درێغی نەکردووە لەو بارەیەوە.
سەڵاح ئەنوەر ئاماژەی بۆ ئەوەشکرد، ھەوڵەکان چڕ کراونەتەوە دژی ئەو کەسانەی ماددەی ھۆشبەر بەکار دێنن و بازرگانی پێوە دەکەن، چونکە جگە لە زیانگەیاندن بەو کەسانەی بەکاری دێنن، زیانی بۆ ھەموو کۆمەڵگە ھەیە و لێکەوتەی کۆمەڵایەتی و ئابووریی لێ دەکەوێتەوە و بووەتە ھۆی تێکدانی شیرازەی چەندین خێزان.
ھاوکات دەشڵێت، بڕیار لەسەر کردنەوەی دوو سەنتەر دراوە و سەرقاڵی ئامادەکردنیانین، یەکێک لە شەقڵاوە و سەنتەرێکیش لەلایەن دەزگای خێرخوازیی بارزانی لە ھەولێر دەکرێتەوە، ئەو دوو سەنتەرە دەبنە شوێنی شیاندنەوەی ئەو کەسانەی ئالوودەی ماددەی ھۆشبەر بوونە، واتە چارەسەری ئەو کەسانەی تووشی ماددەی ھۆشبەر بوونە دەکرێت، ھەروەھا بەپێی ئەو یاسا نوێیەی لە پەرلەمانی کوردستان دەرچووە، سزای توند بۆ بازرگانانی ماددەی ھۆشبەر دیاری کراوە و ڕێوشوێنەکان توندترن دژی ئەو کەسانە.
قائید میرۆ