هه‌ولێر-KDP.info- بەڕێوەبەری گشتی بازرگانی ڕایدەگەیەنێت، ڕاستە کات دیاریکراوە بۆ پڕکردنەوەی فۆڕمی خۆراک، بەڵام هەفتەیەک تا دە ڕۆژ ماوەکەی درێژدەکرێتەوە بۆ ئەوەی ھەموو ھاووڵاتیان سوودمەندبن.
نەوزاد شێخ کامیل، بەڕێوەبەری گشتی بازرگانی هەرێمی کوردستان، بە ماڵپەڕی فەرمیی پارتی دیموکراتی کوردستانی ڕاگەیاند: کاتی پڕکردنەوەی فۆڕمی خۆراک دیاریکراوە تا پێنجی مانگی داھاتووە و دەبێت ھاووڵاتیان پەلە بکەن لە پڕکردنەوەی فۆڕمی ئەلیکترۆنی، بەڵام لەدوای ئەو ماوەیەش دەرفەتی دیکە بە ھاووڵاتیان دەدرێت بۆ ماوەی حەفتەیەک تا ١٠ ڕۆژ ماوەکە درێژ دەکرێتەوە، تا ھەموو ھاووڵاتیەک بتوانێت سوودمەندبێت لەو پڕۆسەیە و فۆڕمی ئەلیکترۆنی پڕبکاتەوە.
ئەوانەی کێشەیان ھەیە بەڕێوەبەری گشتی بازرگانی دەڵێت: ئەگەر ھاووڵاتیەک پرسیارێکی بە ھەڵە پڕکردووتەوە ئەوە دەتوانێت ھەر لە ڕێی ئەو فۆڕمەوە داوای ھاوکاری بکات و بۆی ڕاست دەکرێتەوە، بەڵام بۆ ئەوانەی کێشەی دیکەیان ھەیە دەتوانن سەردانی فەرمانگەکانی فۆڕمی خۆراک بکەن لە پارێزگای خۆیان و کێشەکەیان چارەسەر دەکرێت.
پەیوەست بەو خێزانانەی جیا بوونەتەوە، نەوزاد شێخ کامیل دەڵێت: ئەو ھاوسەرانەی جیابوونەتەوە دەتوانن سەردانی پسوولەی خۆراکی پارێزگاکەیان بکەن و لەوێ فۆڕمی تایبەت ھەیە پێیان دەدرێت بەجیا ناویان تۆمار دەکرێت و مافی بەشداریان ھەیە بۆ پڕکردنەوەی فۆڕمی خۆراک.
قائید میرۆ