کوردستان-KDP.info- هندەک لایەنێن سیاسى ل هەر سێ پارچەیێن دیتر (رۆژهەلات- باکور- رۆژئاڤا) دبێژن: سەربەخویا باشورێ کوردستانێ دبەرژەوەندیا هەر سێ پارچەیێن دیێن کوردستانێ دایە، داکو ل پاشەرۆژێ رێکێن سەربەخۆیێ بۆ وان ژى دروست بکەن.
پشتى 11ى تیرمەها ئەڤ سالە، ئەو سەردانا شاندێ بلندا ریفراندۆمێ ب سەرپەرشتیا سەرۆکێ هەرێما کوردستانێ (مەسعود بارزانى) بۆ پەرلەمانێ ئهورۆپا ل برۆکسل کرى، و داخوازکرنا پشتەڤانیکرنێ دەولەتێن ئۆروپى بۆ ریفراندۆمێ کرى و وان ژى دلخوشى و پشتەڤانیا خۆ راگەهاندى، ئەڤ پرسە بۆ مژارەکا جیهانى و دەنگڤەدا، و هەر د ڤی دەربارەی ژی دا (عارف باوەجانى) سەرۆکێ پارتا سەربەستى کوردستان- رۆژهەلاتێ کوردستانێ، بۆ ماڵپەرێ فەرمیێ پارتى دیموکراتى کوردستان گۆت:" رایا کوردان گرنگترە ژ هەر دیتنەک و بووچوونەکا دیتر، چونکی خەلکێ کوردستانێ دێ بریارێ لسەر ریفراندۆمێ دەت، و بتنێ جیهان چاڤەرێی ئەنجامانە، دەولەتێن جیهانى مایتێکرنا ڤێ پرسێ ناکەن".
(باوەجانى)، ئەو چەندە ژی زەلالکر، وەلاتێن ئۆرۆپى باش دزانن مللەتەکێ یێ داخوازا مافێ خویێ شەرعى دکەت، لەوا پشتەڤانیێ ل ریفراندۆمێ دکەن، لێ نەشێن ب هیچ رەنگەکى خۆ بکەنە پشکەک ژڤێ پرۆسێ، ژبەر ریفراندۆم رێکەکا قانونى یە بۆ سەربەخویا کوردستانێ و ئاخڤتنا شاندێ بلندا ریفراندۆمێ ل هەرێما کوردستانێ ل ناڤا پەرلەمانێ ئۆرۆپا یا روون و ئاشکەرا بوو ژبۆ رازیکرنا وان وەلاتان بوو دا پشتگیریا ریفراندۆمێ بن و دانپێدانێ ب سەربەخۆییا کوردستانێ بکەن و دووڤدا بریارێ لسەر شەرعیەتبوونا دەولەتا کوردى بدەن".
(عارفى) ئاماژە دا کو:" سەربەخۆیا کوردستانێ دبەرژەوەندیا هەموو پارچەیێن دیتر یێن کوردستانێ یە، و دێ پالپشتیەکا ب هێز بیت ژبۆ داخوازکرنا مافێن هەر سێ پارچەیێن دیتر یێن کوردستانێ".
(محەمەد سەعید چیچەک)، ئەندامێ سەرکردایەتیا پارتى دیموکراتى کوردستان- باکور، بۆ مالپەرێ فەرمیێ پارتى راگەهاند:" ژمێژە مللەتێ کورد ل هیڤیا ڤێ بریارا دیرۆکى و چارەنڤیسى، مە ژى پێشوازیەکا مەزن ل بریارا سەرۆکێ هەرێما کوردستانێ (مەسعود بارزانى) کر".
دەربارهى ڤێ چەندێ (چیچەک) گۆتژى:" ئەنجامدانا ریفراندۆمێ بریارەک د جهێ خوهدایە و د بەرژەوەندیا گشت خەلک و لایەنێن سیاسیێن کوردستانێ یە، چونکى چ جارا دوژمنێ مللەتێ کورد مافێ مە نا پارێزیت ئەگەر ئەم بخۆ نەپارێزین".
ئەندامێ سەرکردایەتیا پارتى دیموکراتى کوردستان- باکور ئاماژە دا:" مللەتێ کورد ئەڤرۆ دخوازیت ژ دوژمنێ خو جودا ببیت، لەوا سەربەخۆیا باشۆرێ کوردستانێ دێ بیتە نموونەیەکا سەرکەفتى و کارتێکرنەکا ئەرێنى لسەر هەر سێ پارچەیێن دیتر یێن کوردستانێ هەبیت، ئەگەر سیاستمەدارێن کورد دڤێ ئێکێ بگەهن، چونکى دێ کوردستانێ پەیوەندیێن دەولى و ئەقلیمى هەبن و دێ هەموو هەولا دەت کورد ببن ئێک، لەوا دەولەتێن دەردۆر ژى تا نوکە دژایەتیا سەربەخۆیا باشورێ کوردستانێ دکەن".
(عەبدوللا کدو)، ئەندامێ لێژنا مەرکەزى یا پارتا ئێکەتى کورد- سوریا خویاکر:" شاندێ بلندا ریفراندۆمێ ل پەرلەمانێ ئۆرۆپا بدەرکەفتنەکا باش هاتە پێشچاڤ و کوردان ب شێوەکێ بخو باوەرى و شارستانێ دەست ب دان و ستاندنان کر و دۆزا مللەتێ خۆ دا دیارکرن".
(عەبدوللا کدو) گۆتژى:" سەرکەفتنا سەربەخۆیا باشورێ کوردستانێ دێ بیتە ئەزموونەک بۆ وان وەلاتێن هەر سێ پارچەیێن دیتر یێن کوردستانێ یێن لبن دەست، كو باوەڕیا دناڤبەرا وان و کوردان دا بێتە دروستکرن".
ئەندامێ لیژنا مەرکەزى یا پارتا ئێکەتى کورد- سوریا ئاخفت ژى:" ژ هەموو کوردان دئێتە خواستن پشتەڤانیێ ل ریفراندۆما باشورێ کوردستانێ بکەن وەک ئەرکەکێ نەتەوەیى و مرۆڤایەتى، چونکى کورد بخۆ دێ مافێن خۆ مسوگەرکەن و ب تایبەت ئەڤ ریفراندۆمە لژێر چاڤدێریا جڤاتا نێڤدەولەتى دئێتە کرن، دوور ژ زولم و ژورێن تاریێن دوژمنان".
هەلز عەلى سەلیم