Kurdî  ■  كوردی  ■  عربي
THU, 22 OCT 2020 04:19 Erbil, GMT +3
پارتی دیموکراتی کوردستان
نوێبوونەوە . دادپەروەری . پێکەوەژیان
 

ئه‌و مووشه‌كانه‌ی ئاراسته‌ی هه‌ولێركران كه‌له‌پووشن، پشتی حوشتره‌كه‌ی به‌غدا ده‌شكێنن
| KDP.info


د.محمد خدر مولود 

عه‌ره‌ب خۆیان په‌ندێكیان هه‌یه‌و ده‌ڵێن ( ئه‌و كه‌له‌پووشه‌ی پشتی حوشتره‌كه‌ی شكاند )، په‌ندێكه‌ حوشتره‌وانه‌كانی عێراق و ده‌رودراوسێی له ‌خه‌ڵكی تر باشتر له‌ مانا و ئاماژه‌ شاراوه‌كانی تێده‌گه‌ن.

له‌و چه‌ند شه‌وه‌ی رابردوو ئه‌و چه‌ند مووشه‌كه‌ی هێرشی هێنایه‌ سه‌ر هه‌ولێر و فرۆكه‌خانه ‌و هێزی هاوپه‌یمانانیان به‌ئامانج گرتبوو، با هه‌ر ته‌نیا پووش و په‌ڵاشی ئاقاری گوندی گه‌زنه‌ی سوتاندبێ و ئامانجی مه‌به‌ستداری نه‌پێكابێ، خۆ ئامانجی ماناداری خۆی پێكاوه‌ كه‌ مه‌به‌ست لێی گه‌یاندنی ئه‌و په‌یامه‌ بوو به‌تایبه‌تی به‌ هێزی ئه‌مریكا و هاوپه‌یمانان  بڵێ، هه‌روا به‌ جیهان  بڵێ هه‌ولێر و كوردستانیش شوێنی ئارامی ئێوه‌ نییه.

ئه‌و په‌یامه‌ ناوه‌رۆك روون و ره‌وانه‌ گه‌یشت و له ‌كاتێكدا بوو بۆ هه‌ولێر چاوه‌روانكراو نه‌بوو، هه‌روه‌ك ئه‌و په‌نده‌ كوردییه‌شی ڵێ هات: ( شه‌ڕ له‌ بادینان تۆز له ‌ده‌ركێ مه‌ ). 

ئاخر..به‌ر له‌ شه‌وی 30-9-2020 شه‌وی هێرشه‌ مووشه‌كییه‌ ترسنۆكه‌كه‌ی سه‌ر هه‌ولێر، چه‌ند شه‌و و رۆژێك بوو به‌غدا له‌ژێر فشار و هه‌ژموونی ئه‌مریكییه‌كان و داخستن و گواستنه‌وه‌ی بالیۆزخانه‌كه‌یان و دیداری به‌رێز مسته‌فا كازمی سه‌رۆك وه‌زیران له‌گه‌ڵ نوێنه‌ری وڵاتانی بیانی له‌ به‌غدا و ناره‌زایی پارت و لایه‌نه‌ عێراقییه‌كان  له‌ هێرش و په‌لاماریان بۆ سه‌ر هێز و لایه‌نی بیانی و هاوپه‌یمانان. به‌غدا له ‌بارودۆخێكی سیاسی نائارام و نیگه‌رانی پڕ له ‌مه‌ترسی و ترسناك ده‌ژیا، هه‌ولێریش شه‌وی پێش هێرشه‌كه‌ وه‌زیری به‌رگری ئیتالیا مێوانی بوو. لۆرێنزۆ گۆیڕۆنی به ‌( به ‌رۆژ له‌ به‌غدا بوون و به‌ ‌شه‌ویش له‌ هه‌ولێر بوون ) په‌یامێكی ماناداری گه‌یانده‌ دۆست و نه‌یارانی هه‌ولێر. 

به‌ر له‌و شه‌وه‌ و له‌سه‌ره‌تای ساڵه‌وه‌ و دوای شه‌وی 3-1-2020  و شه‌وی كوشتنی قاسم  سلێمانی و ئه‌بومه‌هدی موهه‌ندس و دواتر شه‌وی هێرشی مووشه‌كی ئێران بۆ سه‌رفرۆكه‌خانه‌ی هه‌ولێر و ده‌وروبه‌ری و شه‌وی پێكان و خستنه‌خواره‌وه‌ی فرۆكه‌ ئوكراینه‌كه‌ له‌ تاران، ناوچه‌كه‌ به‌گشتی و به‌غدا به‌تایبه‌تی  له ‌نێو هه‌ڵایسان و چه‌كه‌ره‌كردنی گرفت له‌دوای گرفت و ئاریشه‌ و هێرشی مووشه‌كی داده‌ژێت.

هه‌ولێریش له‌ دوای ئه‌م به‌رواره‌ی سه‌ره‌وه‌، له‌نێو سه‌رده‌می په‌تای كۆرۆنا كۆڤید19 و قه‌یرانی دارایی و ته‌ندروستی و هاتن و نه‌هاتنی مووچه‌ له ‌به‌غداوه، حه‌شد مووشه‌كی بۆ ده‌نێرێ.

ئه‌و هێرشه‌ مووشه‌كییه‌ی ئه‌وجاره‌یان له ‌ده‌ره‌وه‌ی سنوور نه‌بوو، له‌ نێو سنوور له‌ نێوان هه‌ولێر و نه‌ینه‌وا، له‌ به‌رتله‌ بوو. 

له‌ سه‌رده‌مانێكدا به‌غدا بۆته‌ باغی – داد و باخچه‌ی ململانێی  تاران و واشنتۆن، تۆ بڵێی لێیگه‌ڕێن له‌ نێو ئه‌م هاوكێشه‌ ئالۆزوپاڵۆزه‌دا هه‌میشه ‌و ئارام بێ و جاروبار پڕووشكی ئه‌و ململانێیه‌ی به‌رنه‌كه‌وێ..؟ 

ئێره‌ هه‌ولێره‌. هه‌میشه‌ گوتراوه‌ به‌ سه‌ركه‌وتن فێره‌. سه‌ركه‌وتنی هه‌ولێر به‌سه‌ر ئاسته‌نگ و ئاریشه‌كان، به ‌سه‌ر گرفت و قه‌یرانه‌كان هێز و توانا و خۆراگرییه‌كه‌ی وێرای ئه‌وه‌ی له‌ ره‌وایی پرسه‌كه‌ی سه‌رچاوه‌ی گرتووه‌، له‌ پشوو درێژی و سه‌بر و به‌رگه‌ گرتنیه‌تیه‌شی، له‌وه‌دا ‌ته‌مه‌ن و سه‌بری ئه‌یوبی هه‌یه‌ و ده‌یه‌وێ ئه‌وبێ دواجار پێ بكه‌نێ و دوا گاڵته‌ و سوحبه‌تی خۆی بكات.

سه‌ركردایه‌تی سیاسیی كوردستان و حكومه‌تی هه‌رێمی كوردستان، له ‌مێژه‌ فرچكیان به ‌قه‌یران و ئاسته‌نگ و ئاریشه‌ و گرفته‌كان گرتووه‌و له ‌گه‌ڵ ئاگری ته‌قاندنی یه‌كه‌م فیشه‌كی تفه‌نگی بڕنۆی شۆرشی ئه‌یلووله‌وه‌، ئه‌زموون له‌دوای ئه‌زموونیان بۆ كاری سیاسیی ودبلۆماسی و مانۆره‌كان ده‌كه‌نه‌ تێشووی سه‌فه‌ری سه‌خت و بۆ رۆژانێك دواپیت له‌سه‌ر وشه‌ی سه‌ركه‌وتن و سه‌ربه‌خۆیی دابنێ.

ئێستا هه‌ولێر و هه‌ولێریه‌كان، كوردستان و كوردستانییان، گاڵته‌یان به‌و هێرشه‌ مووشه‌كییه‌ی شه‌وی 30-9 نێو ئاقاری گوندی گه‌زنه‌ دێ و وایان بینی فیشه‌كه‌ شێته‌ن، تۆنتراقه‌ن، یاری ئاگرینی شه‌وانی جه‌ژن و هه‌ینی منداڵانی نێوكۆڵان و گه‌ره‌كان.

ئه‌وێ  شه‌وێی مووشه‌ك بارانه‌كه‌ی هه‌ولێر وای لێده‌خوێندرێته‌وه‌:

ئه‌و ‌مووشه‌كانه‌ی ئاراسته‌ی هه‌ولێر كران، مووشه‌ك نین، ئه‌و كه‌له‌پووشه‌ن گه‌ر به‌غدا به‌خۆی ڕانه‌گا پشتی حوشتره‌كه‌ی ده‌شكێنێ.    

 




دوایین هەواڵەکان

سەرۆك بارزانی پێشوازی لە باڵیۆزی نۆروێژ لە عێراق دەكات

WEDNESDAY, 21 OCTOBER 2020 18:10:09

ھەولێر-KDP. info-  ڕۆژی چوارشەممە 21ـی تشرینی یەكەمی 2020 لە سەلاحەدین سەرۆك مەسعود بارزانی پێشوازی لە خاتوو تۆنی ئاڵێرز باڵیۆزی نۆروێژ لە عێراق كرد.

کۆماری چیک ڕۆژی نیشتمانیی وڵاتەکەی لە کوردستان ساز کرد

WEDNESDAY, 21 OCTOBER 2020 18:10:12

هەولێر-KDP.info- کۆنسووڵگەریی کۆماری چیک لە هەرێمی کوردستان بە بۆنەی ڕۆژی نیشتمانیی کۆماری چیک کە بە ڕۆژی سەربەخۆییی کۆماری چیک‌وسلۆڤاکیا و ڕاگەیاندنی سەربەخۆییی نەتەوەیی دەناسرێت لە هەولێری پایتەخت ساز کرد.

 
سەرۆك بارزانی پێشوازی لە كونسوڵی ژاپۆن لە هەولێر دەكات

WEDNESDAY, 21 OCTOBER 2020 17:10:40

ھەولێر-KDP. info-  ڕۆژی چوارشەممە 21ـی تشرینی یەكەمی 2020 لە سەلاحەدین سەرۆك مەسعود بارزانی پێشوازی لە خاتوو ناگایاما یوشیكۆ كونسوڵی ژاپۆن لە هەولێر كرد.

 
بەڕێوبەری ڕێگاوبانی ھەولێر: دوو ڕێگای ستراتیژی و دوو تونێل دروست دەکرێن

WEDNESDAY, 21 OCTOBER 2020 16:10:48

ھەولێر-KDP.info- بەڕێوەبەری ڕێگاوبانی ھەولێر گوتی، لە سنووری پارێزگای ھەولێر دەست بە دروستکردنی دوو ڕێگای ستراتیژی و دوو تونێل کراوە کە سوودی زۆری بۆ ھاتوچۆ لە سنووری ھەولێر دەبێت.

 

"ڕێککەوتنی شنگال دەکەوێتە واری جێبەجێکردنەوە"

WEDNESDAY, 21 OCTOBER 2020 15:10:33

شنگال-KDP.info- قایمقامی قەزای شنگال دەڵێت، دوای ئەوەی ڕێککەوتنی شنگال ئیمزا کرا ئێستا دەستیان کردووە بە نووسینی ناو بۆ پێکهێنانی هێزێکی پۆلیس بۆ شنگال.

 



 
© 2020 Kurdistan Democratic Party, KDP

Contact