ڕاپەڕین-KDP.info- لە چوارچێوەی چالاکییەکانی یادی هەڵگیرسانی شۆڕشی مەزنی ئەیلولدا، لە ڕێوڕەسمێکی تایبەتدا لە دەڤەری ڕاپەڕین، شەرەفی ئەندامێتی لە پارتی دیموکراتی کوردستان بەخشرا بە ٤٠٠ گەنج و لاوی دەڤەرەکە.
ئەمڕۆ چوارشەممە ١٦ـی ئەیلولی ٢٠٢٦، بە ئامادەبوونی عەلی حوسێن، ئەندامی مەکتەبی سیاسی و بەرپرسی مەکتەبی ڕێکخستنی پارێزگای سلێمانی-هەڵەبجە-ڕاپەڕین، لەگەڵ کرمانج عیزەت، بەرپرسی لقی ١١ـی ڕاپەڕین و ژمارەیەک لە هەڤاڵانی مەکتەب و لق و لێژنە ناوچەکان، ڕێوڕەسمی بەخشینی شەرەفی ئەندامێتی بەڕێوەچوو.
لە سۆنگەی پێزانین بۆ ئەرک و ماندووبوونیان، عەلی حوسێن دەستخۆشی لە ئامادەکارانی ڕێوڕەسمەکە لە سەرکردایەتی لق و لێژنە ناوچەکان کرد. ناووبراو پیرۆزبایی گەرمی لە ئەندامە نوێیەکان کرد بۆ پەیوەندیکردنیان بە پارتی دیموکراتی کوردستان—ئەو حیزبەی بە ڕابەرایەتی سەرۆک مەسعود بارزانی هەمیشە داینەمۆ و داینەمۆکاری سەرەکیی بەدیهێنان و پاراستنی مافە ڕەواکانی گەلی کوردستان بووە.
لە بەشێکی دیکەی وتەکەیدا، بەرپرسی مەکتەبی ڕێکخستنی سلێمانی-هەڵەبجە-ڕاپەڕین جەختی لە گرنگیی بەرزکردنەوەی ئاستی هۆشیاریی کادیران کردەوە و گوتی، "پێویستە هەڤاڵانی پارتی، لە ئەندامێکەوە تا بەرزترین ئاستی ڕێکخستن، بەردەوام لە هەوڵی خۆرۆشنبیرکردندا بن و خۆیان بە چەکی زانست و تەکنەلۆژیای سەردەم پڕچەک بکەن، تاوەکو بتوانین پێکەوە پارتی دیموکراتی کوردستان بەرەو لوتکەی سەرکەوتن و پێشکەوتنی زیاتر ببەین.
