دھۆک-KDP. info- هوشیارییا خەلکێ دهوکێ ودلوڤانییا وان بەرامبەر گیانەوەر وگیانداران جادە وماڵێن دهۆکێ کرینە پەناگەهەک ئارام بۆ گیانەوەران.
رێڤەبەرێ رێڤەبەرییا فیتێرنەری ل دهۆکێ د.نشتمان عارف، بۆ رۆپەلێ فەرمی kdp.info گوت، ل چەند ساڵین دویماهیێ خەلکێ مە ب شێوەیەک دیار بەرێ خۆ دایە خودانکرنا گیانەوەران ل ناڤ مالێ، هەتا کو گیانەوەرێن مرۆڤ هزر تێدا نەکەت وەک شێر و پلنگ و مەیمینک و هتد، وئەڤە رویەکێ دی یێ پێگەهاندن و پێکڤە ژیانێ دیاردکەت، بەلی ژبلی ڤێ چەندێ رێژەیەک مەزن یا گیانەوەرێن بەرەلا ژی ل سەر جادەیان هەنە، و چەندین رویدانێن دل ئێش ژئەگەرێ وان هەبوون، لێ ب خۆشحالیڤە ل ڤان سێ هەیڤێن دویماهیێ ئێکەم شێلتەرێ گیانەوەران یێ حکومی ل سەنتەرێ پارێزگەها دهۆکێ هاتە دروستکرن، بۆ هندێ ئەو گیانەوەرێن زەرەر مەند ژی ل سەر جادەیان بهێنە کونترول کرن و مەترسییا وان ل سەر خەلک و باژێری ب گشتی نەمینیت.
شێلتەر(پەناگەه)، جهەک تایبەتە ژبۆ ڤەحەواندنا گیانەوەرێن بەرەڵا، تێدا جهێ خەو و خوارن و شویشتن و هاتن و چوون و خزمەتگوزارییا پزیشکی و فیتێرنەری و چەندین خزمەتگوزاریێن دهێنە پێشکێشکرن، و ئەو گیانەورێ هاتە ڤەگوهاستن بۆ شێلتەری مامەلەکرنەکا زانستی و نشتەگەریێن پێدڤی بۆ دهێنە کرن بۆ هندێ زەرەر ل سەر وی و بەرامبەر وی نەمینیت، دویفدا دهێتە ژمارەکرن و گوهارکرن بۆ هندێ خەلک ل سەر جادەی ژێک جودابکەت ژگیانەوەرێن دی.
دەربارەی هەبوونا شێلتەرێن گیانەوەران د. نشتمان دووپات دکەت کو ژبلی شێلتەرێ حکومی هندەک شێلتەرێن دی یێن ژێر چاڤدێرییا کەسوکی یان ژی یێن رێکخراوان هەنە، بەلێ ئەم پتر پشتەڤانییا یێن حکومی دکەین چونکە پشت راستین ژهەمی پرۆسەیێن گیانەوەر تێدا دەربازدبن.
رێڤەبەرییا فیتێرنەری رێڤەبەرییەکا خزمەتگوزارییە و خزمەتگوزارییان پێشکێشی گیانەوەر و کلینیکێن گرێدایی فیتێرنەری دکەت هەروەسا وان نەخۆشیێن ژگیانەوەران دهێنە ڤەگوهاستن خۆ لێ دکەتە خودان ب رێیا ڤاکسینکرن و حەملێن ڤەشیشتن و دەرمان رەشاندنیێ و هتد.
ل پارێزگەها دهۆکێ هەتا نوکە ئێک شێلتەرێ حکومی هەیە و ١٩ بنگەهێن فیتێرنەری یێن حکومی و ٧٨ بنگەهێن فیتێرنەری یێن تایبەت هەنە.
سەجا شێرزاد
