دێرەلۆک-KDP. info- ئەڤرۆ ل 2026/9/10 ل ناحیا دێرەلۆک ب هەلکەفتا (65) سالیا هەلگیرسانا شۆڕەشا ئەیلولا مەزن و ژ پێخەمەت بەرز ڕاگرتنا ڤێ شۆڕەشا سەرتاسەری و مێژوویی، ئەڤرۆ ڕێزدار (بەهرام عریف یاسین) ئەندامێ کۆمیتا ناڤین و بەرپرسێ لقا 18 یا پارتی دیموکراتی کوردستان سمینارەک پێشکێشکر.
د ڤێ کۆڕبەند و ڕوونشتنێدا، پێشمەرگێن دێرین و قەهرەمانێن ئەیلولێ، ڕێڤەبەرێ ناحیێ، بەرپرس و دەستەیا کارگێڕی یا ناوچێ، جەماوەرێ خوراگر و وەفادار، هەروەسا کادرێن دەڤەرا دێرەلۆک ئامادە ببوون. ڕێزدار بەرپرسێ لقا 18 د گۆتارا خۆ دا ب وردەکاری تیشک خستە سەر ڕۆڵ و گرنگیا مێژوویی یا شۆڕەشا مەزنا ئەیلولێ وەک وێستگەها هەرە مەزن د خەبات، بەرخودان و دەستکەفتێن نەتەوەیی و نیشتمانی یێن گەلێ کورد دا.
د سمینارێ دا بەرپرسێ لقێ ئاماژە ب دیرۆکا پر سەروەری و قوربانیدانا گەلێ کوردستانێ کر ژ پێخەمەت ب دەستڤەئینانا ماف و ئازادیا خەلکێ کوردستانێ، تایبەت قۆناغێن پارتی خزمەت و خەبات تێدا کری کو هەردەم دەستکەفت بۆ مللەتی هەبووینە، نەخاسمە شۆڕەشا ئەیلولا مەزن ب ڕێبەریا بارزانیێ نەمر کو حکومەتا عێراقێ نەچارکر دانپێدانێ ب مافێن نەتەوەیی، سیاسی و کۆمەڵایەتی یێن خەلکێ کوردستانێ بکەت و ڕێکەفتناما (11)ێ ئادارێ ژی باشترین نموونە و دەستکەفت بوویە.
پاشان ئاماژە ب نویترین پێشهاتێن دەڤەرێ کر و دید و خاندنا پارتی و جەنابێ سەرۆکی بۆ ڕەوشا هەنووکەیا عێراقێ و هەرێمی ڕوون کر و دووپاتکر کو پتر ژ هەر قۆناغەکا بوری پێدڤیا خەلکێ کوردستانێ ب ڕێبەریا جەنابێ سەرۆک بارزانی و هەڵویستێن نەگهۆڕێن پارتی هەیە دا کۆ دەستکەفتێن ئەڤرۆ پاراستی بن و بەرەف پێشتر ب هێزتر بچین.
