دھۆک-KDP. info- ب هەڵکەفتنا 65 مین سالیادا شۆڕشا ئەیلولا مەزن، ئێکەتیا ئافرەتێن کوردستانێ چالاکییەکا تایبەت بۆ بەرزڕاگرتنا ڕۆڵ و خەباتا ئافرەتێن کوردستانێ د شۆڕشێ دا، ل هۆلا کۆنفرانسان ل زانکۆیا دهۆک سازکر.
ئەڤ چالاکیە ب ئامادەبوونا بەڕێزان سەربەست لەزگین ئەندامێ مەکتەبا سیاسی و بەرپرسێ مەکتەبا ڕێکخستنا پ.د.ک ل بەھدینان، د. ڤیان سلێمان ھاریکارا بەرپرسێ مەکتەبا رێکخستنێ، د. عەلی تەتەر پارێزگارێ دھۆکێ،زیبا تاھا سکرتێرا ئێکەتیا ئاغرەتێن کوردستانێ، نەوزاد عەبدوللا بەرپرسێ لقێ ئێک، و جەماوەرەکێ بەرفرەھ بڕێڤەچوو.
بەڕێز سەربەست لەزگین، د پەیڤەکێ دا ب تێرۆتسەلی ل سەر قۆناغێن بەریا شۆڕشا ئەیلولێ، هۆکارێن دەستپێکرنێ، و داستان و سەرکەفتنێن پێشمەرگەی ئاخفت و ئاماژە ب وێ یەکێ ژی کر کو سەرکەفتنێن پێشمەرگەی د قادا جەنگی دا، حکومەتێن عێراقێ ناچاری مێزا دانوستاندنێ کرن، کو بەرهەمێ وێ ڕێکەفتننامەیا مێژوویی یا 11ی ئادارێ بوو.
بەرپرسێ مەکتەبا ڕێکخستنێ تیشک ئێخستە سەر ڕۆڵێ کارایێ ئافرەتا کورد، کو مل ب ملێ هەڤژین و برایێن خۆ یێن پێشمەرگە پشکدار بوویە دشۆڕشێ دا، چ ل بەروکێن شەڕی، دەرمانکرنا برینداران، دابینکرنا هاریکاریا لوجستی، چ ژی د پرۆسەیا پەروەردەکرنا زارۆکان.
دڤێ چالاکیێ دا فلمەکێ دەکیومێنتاری ل سەر ڕۆڵ و خەباتا ئافرەتا کورد د شۆڕشێ دا هاتە نیشاندان، کو ژ لایێ ژوورا هەڤپەندیا سیاسی یا دیجیتاڵی ل مەکتەبا ڕێکخستنێ ڤە هاتبوو بەرهەڤکرن.
پرۆگرام ب ئەنجامدانا دیبەیتەکا تایبەت و پێشکەشکرنا چەندین چالاکیێن دی ێن هونەری و کلتوری ب دووماھی هات.