هەولێر-KDP.info- وەزیری ناوخۆی حكوومەتی هەرێمی كوردستان ڕایگەیاند، هێزەكانی هاوپەیمانان ڕێكارەكانی كشانەوەیان لە هەرێمی كوردستان دەست پێ كردووە، بۆیە نابێت ڕێگە بدەین كەلێنی تەناهی دروست بێت.
ئەمڕۆ پێنج شەممە 10ـی ئەیلوول، ڕێبەر ئەحمەد وەزیری ناوخۆ لە كۆنگرەیەكی رۆژنامەوانیدا ڕایگەیاند، ''نابێت دوای كشانەوەی هاوپەیمانان بۆشایی تەناهی لە عێراق دروست ببێت، ئێستا هێزەكانی هاوپەیمانان ڕێكارەكانی كشانەوەیان دەست پێ كردووە.
وەزیری ناوخۆ زیاتر گوتی، ''بۆ بودجە گفتوگۆ هەیە، داواكەی هەرێم لەبارەی دابەشكردنی داهاتی فیدراڵی یاسایی و ڕەوایە.
لەبارەی پرۆسەی بەرهەمهێنانی نەوت ئاشكرای كرد، ''بەشێك لە كۆمپانیاكانی نەوت دەستیان بە كاركردن كردووەتەوە، هەروەها كۆمپانیاكانی نەوت داوای گەرەنتی پاراستن لە حكوومەتی عێراق دەكەن.
ئاماژەی بەوەش كرد، ''پێویستە دۆخی شنگال ئاسایی بكرێتەوە، بۆ ئەوەی دەست بە ئاوەدانكردنەوەی قەزاكە بكرێت، دانانی قایمقامێكیش هەنگاوێكی باش دەبێت.