دھۆک-KDP.info- رێڤەبەرێ فەرمانگەها ژینگەها دهۆکێ دبێژیت: ساڵ بۆ ساڵێ رەوشەنبیرییا ژینگەه پارێزیێ و هەستکرن ب بەرپرسیارەتیا خەلکێ مە بەرامبەر ب ژینگەهێ زێدە دبیت و ئەڤ چەندە بەرچاڤ دهێتە دیتن هەر ژپاقژ راگرتنا خەلکێ مە جادە و جهێن گشتی و چاندا داران ل جه و ماڵان دیسان کێمبوونا سەرپێچیێن داربرینێ.
دلشاد عەبدولرەحمان، رێڤەبەرێ فەرمانگەها ژینگەها دهۆکێ دلێدوانەک تایبەت دا بۆ مالپەرێ فەرمی یێ پارتی دیموکراتی کوردستان دیاردکەت: دبەردەوام دیفچوونا مە و کارێ رۆژانە دا، دووپات دبیت کو ژینگەها دهۆکێ رۆژ بۆ رۆژێ پاقژ ترە و ئەڤ چەندە گرێدای هوشیارییا خەلکێ مەیە ل سەر گرنگییا ژینگەهێ ژبۆ هەمی بوارێن ژیانێ، چونکە دبینین ب رێیا سوشیالێ خەلکەک هوشیاری و بوچونێن خۆ بەڵاڤ دکەن و جاران ژی بەشەک ژوان راستەوخۆ پەیوەندییان ب فەرمانگەها مە دکەن و هزرێن نوی و جوان یێن خۆ بۆ مە داترێژن، دیسان زێدەبوونا هەوێن پاقژکرنێ و رێکخراوێن گرێدای ژینگەهێ دبنە نیشانا هوشیارییا خەلکێ مە دڤی بابەتی دا.
هەروەسا دووپات دکەت: کو پاقژییا ژینگەهێ نە ب تنێ گرێدای هەست و رەفتارێن خەلکێ یە بەرامبەر ژینگەهێ، بەلکو بەردەوام جێبەجێکرنا فەرمان و رێنما و یاسایێن گرێدای ژینگەهێ هاریکارە ژبۆ بلندکرنا ئاستێ پاقژیێ وژینگەه پارێزیێ،
ل هەرێما کوردستانێ یاسا ژمارە ٨ یا سالا ٢٠٠٨ێ یا گرێدایی ژینگەهێ دهێتە جێبەجێکرن و حکومەتا هەرێما کوردستانێ دهەمی کار و پلانێن خۆدا بابەتێ ژینگەهێ بەرچاڤ وەلگرتییە و هەماهەنگییەک باش دناڤ بەرا فەرمانگەها ژینگەهێ و هەمی فەرمانگەهێن دی یێن هەرێمێ هەیە ژبۆ پاراستنا ژینگەهێ.
ژبەر کو کەسکاتی ئێک ژژێدەرێن سەرەکی یێن پاقژکرنا ژینگەهێ یە، ل دویف وان ئامارێن سەروکاتییا باژێرڤانییا دهۆکێ و فەرمانگەها ژینگەها دهۆکێ بۆ مالپەرێ مە دیارکرین، رێژا کەسکاتیێ ل پارێزگەها دهۆکێ دڤێ ساڵێ دا گەهشتییە١٣-١٤٪، و هەردووک لایەن ژی دووپات دکەن کو چ سنور و رێژێن دەستنیشانکری ژبۆ گەهشتنا ڤێ رێژێ نە داناینە، بەلکو ئەو بەردەوام کاردکەن ژبۆ بلندکرنا وێ و هندی ئەڤ ریژە بلندتر بیت دێ پتر دخزمەتا باژێر و وەڵاتێ مەدابیت.
ل دویف وان ئامارێن شێروان حەسەنی ژراگەهاندنا سەروکاتییا باژێرڤانییا دهۆکێ تایبەت بۆ kdp.info دیارکرین، ل سنوورێ دهۆکێ ١٤٥ پارک و باخچەیێن بچویک یێن دناڤ گەرەک و کولانان دا هەنە و ١٣ پارکێن دی یێن گشتی یێن مەزن ژی هەنە، ژوانا پارکا ئالوکایە کو ئێکە ژمەزنترین پارکێن هەرێما کوردستانێ و عیراقێ ژلایێ رووبەر و رێژا کەسکاتیێ ڤە، کو نوکە ئەو پارک ل ژێر دروستکرنێ یە و ب بدویماهیک ئینانا ڤێ پارکێ دهێتە پێشبینیکرن، رێژا کەسکاتیێ بگەهیتە ١٧-١٨٪ و هەبوونا ڤێ رێژا کەسکاتیێ دگەل بەردەوام پاراستنا ژینگەهێ دێ ئاستێ پاقژییا ژینگەهێ ل دهۆکێ بلندکەت.
ژبەر کو حکومەتا هەرێما کوردستانێ تەکەزێ ل وێ چەندێ دکەت کو کەرتێ تایبەت و خەلک بخۆ ژی دپروسەیا کەسککرنا باژێری دا بەژداربن، سەروکاتییا باژێرڤانییا دهۆکێ دگەل دانا هەر دەستویرییەکا ئاڤاکرنێ خودانێ مامەلێ نەچاردکەت پتر ژدارەکێ دئاڤاهیێ خۆ دا بچینت، و هۆسا هەر یەکەیەک نێشتەجێبوونێ دێ بەژداربیت دپرۆسەیا کەسکرنێ دا.
هەژی گوتنێ یە، ل پارێزگەها دهۆکێ هەمی دەستویریێن کارگەهان ژی ل رێیێن دویر ژسەنتەرێ باژێری دهێنە دان بۆ هندێ کارتێکرنێ ل کەش و هەوایێ باژێری نەهێتە کرن، هەروەسا بەرمایکێن کارگەها گلێشێ ئەوا ل کومەلگەها کواشێ(دهۆک) وەکو زبل(پەین) بۆ بهێزکرنا داروبارێ دهۆکێ و پارکێن نوی هاتە بکارئینان، و ئەڤە ژی وەک پێنگاڤەک نایاب دهێتە هەلبژارتن ژبۆ پاراستنا ژینگەهێ.
سەجا شێرزاد-دهۆک
