دهۆک -KDP.info- مەکتەبا ڕێکخستنا پارتی دیموکراتی کوردستان ل بەهدینان، ل 38مین ساڵیادا ئەنفالێن ڕەش دا پەیامەک بڵاڤ کر و ڕاگەهاند، ئەنفال تاوانەکا مەزنا جینۆسایدێ بوو و داخوازێ ژ حکومەتا عێراقا فیدرال دکەت ب بەرپرسیاریا خۆ یا ئەخلاقی، یاسایی و دەستووری ڕاببیت بۆ دیارکرنا چارەنڤیسێ بێ سەروشوینکریان و ڤەدیتنا گۆڕێن ب کۆمەل و قەرەبووکرنا کەسوکارێن قوربانییان و تەڤایا وان زیانێن ب ئاخ، ژینگەھ و خەلکێ کوردستانێ کەتین بکەت.
ئەڤرۆ سێشەمبی 25ی تەباخا 2026ێ، مەکتەبا ڕێکخستنا پارتی دیموکراتی کوردستان ل بەهدینان ب هەلکەفتا 38مین ساڵیادا ئەنفالێن بەهدینان پەیامەک بڵاڤ کر.
دەقێ پەیاما مەکتەبا ڕێکخستنا پارتی دیموکراتی کوردستان ل بەهدینان:
ب ناڤێ خودێ مەزن و دلۆڤان
ئەڤرۆ 25ی تەباخێ، 38 سال ب سەر زنجیرە تاوانێن ئەنفالان دا دەربازدبن، ئەو تاوانێن کۆمکوژیێ، یێن ژلایێ ڕژێما بەعسا ژناڤچووی ڤە، ب سەرکردایەتییا سەرۆکێ ڕژێما بەعسا ژ ناڤچووی سەدام حوسێنێ دکتاتۆر و ب چاڤدێرییا ڕاستەوخۆیا عەلی حەسەن مەجید (عەلی کیمیایی) ل دژی گەلێ مە هاتینە ئەنجامدان.
د ڤێ تاوانا مەزنا جینۆسایدێ دا، پتر ژ 182,000 وەڵاتیێن بێگونەهێن کورد د گۆڕێن ب کۆم دا هاتنە جینۆسایدکرن، پتر ژ 4,500 گوند ب تەمامی ھاتنە وێرانکرن، ب سەدان مزگەفت و دێر و جهێن دیرۆکی ھاتنە ژناڤبرن، ب ئارمانجا گوھۆڕینا دیموگرافیا کوردستانێ.
ئوپەراسیۆنێن ئەنفالان، ل گۆرەی نەخشەیەکێ داڕێژتی د 8 قۆناغێن سەرەکی دا هاتنە جێبەجێکرن.
پشتی بڕێڤەبرنا حەفت قۆناغان ل دەڤەرێن کەرکووک، سلێمانی و هەولێرێ، قۆناغا هەشتێ و دووماھیێ، ل دەڤەرا بەھدینان دەستپێکر. ڕژێمێ ب پشکداریا سەدان هەزار سەرباز، جاش و چەکدارێن خۆ، ژ چەند لایان ڤە ھێرش کرە گوندێن دەڤەرێ. د ڤێ قۆناغێ دا جۆرەها چەکێن کوژەک، ژ فرۆکە، تانک و تۆپان تا دگەهیتە چەکێ کیمیاوی یێ قەدەغەکری، ل دژی خەلکێ سڤیل هاتنە بکارئینان.
ژ ئەنجامێ بومبەبارانا کیمیاوی و دوورپێچا زەمینی، ب دەهان هەزار کەس بۆ قوتارکرنێ گیانێ خۆ، نەچاربوون، ملک و مال و سامانێ خۆ بھێلن بەرەڤ سنوورێن تورکیا و ئیرانێ (باکوور و ڕۆژھەلاتێ کوردستانێ) کۆچبەرببن. هەژمارەکا مەزنا ژن، زاڕۆک و دانعەمران، بێی خوارن و ڤەخوارن و دوورپێچکری ل چیایێن دەڤەرێ مانە ئاسێ، و پشتی کەفتینە دەستێ هێزێن ڕژێمێ، بێ ڕەحمانە بۆ بیابانێن ژێریا عێراقێ هاتنە ڕاپێچکرن و د گۆڕێن ب کۆم دا ھاتنە بن ئاخکرن.
ئەنفال نە ب تنێ ھێرشەکا لەشکری بوو، بەلکو بەڕنامەیەکێ، ڕێکخستی و داڕێژتیێ ڕژێما ژ ناڤچوویی بوو، د چاڕچۆڤێ وێ پلانا دگۆتێ سیاسەتا عەردێ سۆتی (سیاسة الارض المحروقة) بۆ قڕکرنا گەلێ کورد و ژناڤبرنا ناسنامە، کەلتوور و ژینگەها وی دھاتە بجھئینان.
ئەم د ڤێ ھەلکەفتا خەمگین دا، تەکەزیێ دکەین کو تەڤایا تاوانێن ڕژێما بەعس، ژ کۆمکوژیا بارزانیان، کوردێن فەیلی تا کیمیابارانا هەلەبجە و ئەنفالکرنا خەلکێ مە، ھەمی تاوانێن جینۆسایدێ نە، ب دەربازبوونا دەمی، نە مافێ وان یێ یاسایی دکەڤیت و نە ژی دھێنە ژبیرکرن.
پێدڤیە ئەڤ تاوانە، وەکو پشکەک ژ دیرۆکا خەبات و تراژیدیا گەلێ مە بھێنە دەکۆمێنتکرن و ب زیندی د بیردانکا گەلێ مە و تەڤایا مرۆڤایەتیێ دا بھێنە پاراستن.
ھەر د ڤێ یادا پڕ ب ئازار دا، داخوازێ ژ حکومەتا عێراقا فیدرال دکەین، ب بەرپرسیاریا خۆ یا ئەخلاقی، یاسایی و دەستووری ڕاببیت و ب جدێ کار ل سەر دیارکرنا چارەنڤیسێ بێ سەروشوینکریان و ڤەدیتنا گۆڕێن ب کۆمەل و قەرەبووکرنا کەسوکارێن قوربانییان و تەڤایا وان زیانێن ب ئاخ، ژینگەھ و خەلکێ کوردستانێ کەتین بکەت.
دیسان داخوازێ ژ کۆمەلگەھ و ڕێکخراوێن نیڤدەولەتی دکەین، ب ئەرکێ خۆ یێ یاسایی و مرۆڤایەتی بەرامبەر ڤان تاوانێن کۆمکوژیێ یێن ل دژی گەلێ مە ھاتینە ئەنجامدان، و وەکو تاوانێن جینۆسایدێ بدەنە نیاسین.
سەرەڕای هەمی وێرانکاری و هەوڵێن قڕکرنێ و سڕینا ناسنامەیا نەتەوەیی یا گەلێ مە، ژ لایێ ڕژێما بەعس یا فاشی ڤە، لێ گەلێ مە ب ئیرادەیەکا پۆلایین، ل سەر ئاخا خۆ ما و ڕژێما بەعس ژی بۆ ھاتا ھەتایێ ژ ناڤچوو و بوو پشکەک ژ دیرۆکەکا پڕی شەرمەزاری.
هەرێما کوردستانێ و دام و دەزگەھێن وێ یێن یاسایی و دەستووری، شاھدێن وێ راستییێ نە، کو ئیرادەیا گەلێ کورد ژ ئەنفال و کیمیاباران و گۆڕێن ب کۆم بھێزترە و سەرکەفتن ھەر بارا وی یە.
ل دووماھێێ سەرێ ڕێز و نەوازشێ بۆ شەھیدێن ئەنفالێن بەھدینان و تەڤایا شەھیدێن کوردستانێ و سەر کاروانێ شەھیدان بارزانیێ نەمر و کاک ئیدریسێ جانەمەرگ دچەمینین.
مرن و سەرشۆڕی بۆ ئەنجامدەرێن تاوانێن ئەنفالان.
ھەر بەرز و بلندبیت ئالایێ کوردستانێ و کوردستان ھەڕا ئارام و ئاڤەدانبیت.
مەکتەبا ڕێکخستنا پارتی دیموکراتی کوردستان – بەهدینان
25ی تاباخا 2026