ھەولێر-KDP. info- وەزیری کاروکاروبارى کۆمەڵایەتى حکوومەتى هەرێمى کوردستان دەڵێت، بەردەوامین لە هەوڵی هاوتاکردنی مووچەی خاوەن پێداویستییە تایبەتەکان لەگەڵ عێراق و لە حەفتەی داھاتوو شاندێکی بەغدا بۆ ئەم مەبەستە دێنە ھەولێر.
کوێستان محەمەد وەزیری کاروکاروبارى کۆمەڵایەتى حکوومەتى هەرێمى کوردستان، بە ماڵپەڕى فەرمیی پارتى دیموکراتى کوردستانى ڕاگەیاند "زیاتر لە ٧٠ هەزار خاوەن پێداویستى تایبەت مووچە وردەگرن، لە ساڵى ٢٠١٤ەوە، زیاتر لە ١٣ هەزار خاوەن پێداویستى تایبەت مامەڵەیان بۆ تەواو کراوە، بەڵام بەهۆی قەیرانی دارایی مووچەیان بۆ نەبەسراوە."
کوێستان محەمەد گوتى "ئێمە تەواوى زانیارییەکانى ١٣ هەزار خاوەن پێداویستیە تایبەتەکانمان لەڕێگای ئەنجوومەنی وەزیرانەوە ئاڕاستەى عێراق کردووە، بۆ ئەوەى مووچەیان بۆ ببەسترێت، چەندان کۆبونەوەشمان لەگەڵ وەزارەتى کاروبارى عێراق ئەنجام داوە، لە هەفتەى داهاتووش وەفدێکى ئەوان دێنە هەولێر."
وەزیرى کار و کاروبارى کۆمەڵایەتى دەڵێ "مووچەى چاودێرى خێزان لە پارێزگاکانى عێراق هەیە، ئێمە داوامان لە حکوومەتى عێراق کردووە مووچەى چاودێرى خێزان لە هەرێمى کوردستان بۆ ئەو هاووڵاتیانەى دۆخى داراییان باش نییە دابین بکرێت، ئێمە بەردەوام لەو چوارچێوەیە جەخت لەسەر مافى خاوەن پێداویستى و هاووڵاتیانمان کە پێویستیان بە دابینکردنى مووچەى چاودێرى کۆمەڵایەتى هەیە دەکەینەوە."
ئاماژەى بۆ ئەوەشکرد "مووچەى خاوەن پێداویستى تایبەت لە کوردستان ئێستا ١٥٠ هەزارە بۆ ئەو خاوەن پێداویستى تایبەتەى هیچ مووچەیەکى ترى نییە، ئەو خاوەن پێداویستى تایبەتەش مووچەى ترى هەبێت بڕى ١٠٠ هەزار دیناری مانگانەی پێدەدرێت، لە عێراق مووچەى خاوەن پێداویستى تایبەت لە نێوان ١٠٥ هەزار دینار بۆ ٤٢٠ هەزار دینارە، بەپێ ئاستى ژیانى خێزانەکان مووچەکانیان دیارى کراوە، ئێمە داوامان کردووە مووچەى خاوە پێداویستى تایبەت بەپێی یاسا و ڕێنماییەکان زیاد بکرێت.
لە چوارچێوەى ڕێنماییەک لە نێوان وەزارەتمان و وەزارەتى تەندروستى، ئەو خاوەن پێداویستى تایبەتانەى مووچەیان هەیە و ناسنامەیان هەیە، لەگەڵ ئەو خاوەن پێداویستى تایبەتانەش کە مووچەیان نییە ناسنامەیان بۆ دروست دەکەین، لە هەموو نەخۆشخانەکانى تەندروستى لێخۆشبوونیان بۆ دەکرێت، کەسانى خێزانى خاوەنپێداویستى تایبەت کە سەرۆک خێزانە لە کاتى نەخۆشیدا نووسراویان بۆ دەکەین لە نەخۆشخانە ئەهلییەکان داشکاندنیان بۆ بکەن."
عەزیز ڕەسووڵ