ھەولێر-KDP.info- حکوومەتی ھەرێمی کوردستان ڕاگەیەندراوێکی لەبارەی بڕیارەکانی ئەمڕۆی دادگای باڵای فیدڕاڵی بڵاو کردەوە کە بڕیاری دابوو سەرجەم ئەو سکاڵایانە رەت بکاتەوە کە دژی حکوومەتی ھەرێم تۆمار کرابوون.
حکوومەتی ھەرێمی کوردستان لە ڕاگەیەندراوێکدا ڕایگەیاند: ئەمڕۆ چوارشەممە ١٩ی ئابی ٢٠٢٦، دادگای باڵای فیدڕاڵیی عێراق، ئەو سکاڵایانەی ڕەت کردەوە کە لەلایەن ھەریەک لە (وەزیری داراییی فیدراڵی، بەڕێوەبەری گشتیی بانکی ڕافیدەین، بەڕێوەبەری گشتیی بانکی ڕەشید و بەڕێوەبەری گشتیی کۆمپانیای دڵنیاییی نیشتمانی)، لە دژی حکوومەتی ھەرێمی کوردستان تۆمار کرابوون.
حکوومەتی ھەرێم ڕاشیگەیاند: ئەو سکاڵایانەی تۆمار کرابوون، تانەیان لە نادەستووریبوونی بڕیاری ژمارە (٣٣٢٦)ی ساڵی ١٩٩٢ دەدا و داوای ھەڵوەشاندنەوەیان دەکرد، کە پەیوەستە بە تۆمارکردن و گواستنەوەی خاوەنداریەتیی موڵک و باڵەخانە حکوومییەکان لە ھەرێم بۆ سەر ناوی وەزارەتی دارایی و ئابووریی حکوومەتی ھەرێمی کوردستان.
حکوومەتی ھەرێمی کوردستان ئاماژەی بەوەش دا کە، دادگای فیدراڵی بڕیاری دا سەرجەم ئەو سکاڵایانە لەبەر نەبوونی تایبەتمەندیی دادوەری ڕەت بکرێتەوە.