ھەولێر-KDP.info-  سەرۆکی ھەرێمی کوردستان، لە ساڵیادی بۆردومانکردنی قەڵادزێ و زانکۆی سلێمانیدا پەیامێکی راگەیاند ئەمە دەقەکەیەتیی:

ئەمڕۆ بە ڕێز و شکۆوە یادی 52 ساڵه‌ى قوربانییانی بۆردومانکردنی قەڵادزێ و زانکۆی سلێمانی دەکەینەوە. ئه‌و تاوانكارییه‌ى 24ی نیسانی 1974 کە ڕژێمى ئه‌وساى عێراق ئه‌نجامى دا و تیایدا دەیان قوتابی و مامۆستا و هاووڵاتیی بێتاوان شەهید و بریندار بوون.

بەئامانجگرتنی زانکۆ وەک ناوەندێکی زانستی و شاری قەڵادزێ وەک مەڵبەندێکی نیشتمانپەروەری، هەوڵێکی بێهوودەی ڕژێم بوو بۆ تێکشکاندنی ئیرادەی گەلی کوردستان، بەڵام خوێنی شەهیدان، بووە گوڕوتینێکی زیاتر بۆ بزووتنەوەی ڕزگاریخوازی کوردستان و کاروانەکەی بەرەو ئازادی بەگوڕتر کرد.

لەم یادەدا، سەری ڕێز و نەوازش بۆ گیانی پاکی شەهیدان دادەنوێنین و سڵاو بۆ کەسوکاری سەربەرزیان دەنێرین. دووپاتی دەکەینەوە قەڵادزێ و پشدەر کە هەمیشە قەڵایەکی پتەوی شۆڕش و قوربانیدان بوون، لە هەموو ڕوویەکەوە شایستەی باشترین بایه‌خپێدان و ئاوڕلێدانه‌وەى جددین.

سڵاو لە گیانی پاکی شەهیدانی قەڵادزێ و تەواوی شەهیدانی کوردستان، یادیان هەمیشە بە خێر.

نێچیرڤان بارزانی
سەرۆکی هەرێمی کوردستان
2026/4/24