ھەولێر-KDP.info- وەزیری پەروەردەی حکوومەتی ھەرێمی کوردستان، ڕایگەیاند کە لەسەر ڕاسپاردەی سەرۆکی حکوومەت، زنجیرەیەک گۆڕانکاریی ڕیشەیی لە پڕۆسەی تاقیکردنەوەکانی پۆلی ١٢ی ئامادەیی ئەنجام دراون کە ئامانجیان دابینکردنی دادپەروەری و پاراستنی باری دەروونیی قوتابیانە، ھاوکات وەزارەت ڕێنمایی نوێی بۆ یەکپۆشیی ناوەندەکانی خوێندن بۆ ساڵانی داھاتوو دەرکرد.
دکتۆر ئاڵان حەمە سەعید، وەزیری پەروەردەی حکوومەتی ھەرێمی کوردستان، بۆ ماڵپەڕی فەرمیی پارتی دیموکراتی کوردستان گوتی، پێش کابینەی نۆیەم لەماوەی ٣٠ ساڵی ڕابردوو ڕۆژێک نا ڕۆژێک یاخود ڕۆژانە تاقیکردنەوە دەکرا لە پۆلی ١٢ی ئامادەیی، بەڵام لە کابینەی نۆیەم زۆر موراعاتی بواری دەروونی قوتابی کراوە و لە ھەفتەی دوو تاقیکردنەوە دەکرێت، بۆیە ئەمانە ھەمووی گرنگە و پێشتر ھەموو تاقیکردنەوەکانی پۆلی ١٢ی ئامادەیی خولی دووەم لەسەر یەک بوو ئێستا کراوەتە ڕۆژێک نا ڕۆژێک و کاتێک قوتابی پێشتر تاقیکردنەوەی دەکرد ڕەنگە ئەنجامەکانی خۆی باش نەدەزانی و نمرەکانم چۆنە، ئێستا لەم کابینەیە ھێندە شەفاف کراوە ھەموو قوتابیەک نامەی کارەکانی خۆی دەبینێتەوە بە پەنجەمۆری خۆی و نمرەکان و پرسیارەکان دەبینێت و دیاریکراوە لەکوێ ھەڵەیە و وەڵامی ڕاستیش چیە.
وەزیری پەروەردە جەختیش دەکاتەوە، ئێمە کارێکمان کردووە قوتابی پۆلی ١٢ لە سترێس و دوو دڵی ڕزگارکراوە و تاقیکردنەوە کاتیان پێدراوە و لە ھەفتەیەک دوو ڕۆژ تاقیکردنەوەی ھەیە و قوتابی پێشتر ٢٠ تا ٢٥ ڕۆژ مۆڵەت پێش تاقیکردنەوەی ھەبوو ئێستا ٤٠ ڕۆژ مۆڵەتی ھەیە بۆ ئەوەی بخوێنێت، بۆیە ھەم شەفافیەت و ھەمیش دادپەروەری بۆ قوتابی دابین کراوە ئەمانە کاری گەورەن ولەم کابینەیە بە ڕاسپاردە و فەرمانی سەرۆکی حکوومەت بۆ دادپەروەری ئەو کارەمان ئەنجامداوە ئەوەش ڕیفۆرم و کاری گرنگ بوون بۆ قوتابیان.
لە لایەکی ترەوە، وەزارەتی پەروەردە بڕیاری یەکپۆشیی نوێی بۆ ساڵی خوێندنی ٢٠٢٦-٢٠٢٧ ڕاگەیاند، کە تێیدا ڕەنگی جلوبەرگەکان بەپێی قۆناغەکان دابەش کراون، بۆ باخچەی ساوایان ڕەنگی پرتەقاڵی و نیلی، بۆ قۆناغی بنەڕەتی (١-٦) مارۆنی و نیلی، بۆ پۆلەکانی (٧-٩) نیلی و ڕەساسی، و بۆ قۆناغی ئامادەییش ڕەنگەکانی ڕەساسی و ڕەش دیاری کراون. ئەم ھەنگاوانە وەک بەشێک لە پڕۆسەی ڕیفۆرمی پەروەردەیی ھەژمار دەکرێن کە مەبەست لێیان ڕێکخستنەوەی ژینگەی خوێندن و کەمکردنەوەی جیاوازییە کۆمەڵایەتییەکانە لە ناوەندەکانی خوێندندا.
بڵند ئیبراهیم