دهۆک-KDP.info- نوێنەری وەزارەتی بازرگانیی هەرێم لە بەغدا ڕایدەگەیەنێت، کە ئامارەکانی وەزارەتی بازرگانیی عێراق سەبارەت بە لادانی پێنج ملیۆن ناوی زیادە ورد نین و جەخت دەکاتەوە کە تەنیا لە هەرێمی کوردستان 300 هەزار هاووڵاتی بەهۆی ئاستەنگە تەکنیکییەکانەوە نەیانتوانیوە خۆیان لە سیستەمی ئەلیکترۆنیی فۆرمی خۆراک تۆمار بکەن.

حوسێن سەبری، نوێنەری وەزارەتی بازرگانیی هەرێم لە بەغدا، بە ماڵپەڕی فەرمیی پارتی دیموکراتی کوردستانی ڕاگەیاند: "ئەو زانیارییانەی وەزارەتی بازرگانیی عێراق بڵاوی کردوونەتەوە کە گوایە پێنج ملیۆن ناوی زیادە لە فۆرمی خۆراک لادراون، بەو شێوەیە نین، چونکە ڕێژەیەکی زۆری ئەو ژمارەیە ئەو کەسانەن کە لە دەرەوەی وڵاتن یان بەهۆی نەبوونی کارتی نیشتمانی لە کاتی دیاریکراودا، نەیانتوانیوە خۆیان تۆمار بکەن."

سەبارەت بە دۆخی هەرێمی کوردستان، سەبری ئاشکرای کرد: "تەنیا لە هەرێمی کوردستان 300 هەزار هاووڵاتی لە سیستەمی ئەلیکترۆنیی فۆرمی خۆراک تۆمار نەکراون. بەشێکی کەمی ئەو ژمارەیە ئەگەری هەیە ناوی دووبارە بن، بەڵام زۆرینەیان بەهۆی نەبوونی کارتی نیشتمانی یان مانەوەیان لە دەرەوەی وڵات، لە پرۆسەکە جێماون."

ناوبراو ئاماژەی بە کێشەی هاووڵاتیانی ناوچە کوردستانییەکانی دەرەوەی ئیدارەی هەرێم کرد و گوتی: "کارتی نیشتمانی ئاستەنگی سەرەکییە، بەتایبەت بۆ هاووڵاتیانی ماددەی 140، کە هەندێک جار دەرهێنانی کارتەکە دوو ساڵ دەخایەنێت، بەبێ ئەو کارتەش هاووڵاتی ناتوانێت لە سیستەمەکەدا ناوی خۆی تۆمار بکات."

لە کۆتایی لێدوانەکەیدا، حوسێن سەبری مژدەی بەو هاووڵاتیانەدا کە ناویان تۆمار نەکراوە و ڕایگەیاند: "هەموو ئەو کەسانەی لە کاتی خۆیدا نەیانتوانیوە بەشداری پرۆسەکە بکەن، ئێستا دەتوانن ناوی خۆیان تۆمار بکەن، بەڵام لە بەرامبەر تۆمارکردنی هەر کەسێکدا بڕی شەش هەزار دینار وەردەگیرێت."

قائید میرۆ