هەولێر-KDP.info- بەرپرسی نووسینگەی کاروباری کوردانی فەیلی لە بارەگای بارزانی ڕایگەیاند، سەرەڕای تێپەڕبوونی ٢٣ ساڵ بەسەر ڕووخانی ڕژێمی پێشوو، بەڵام حکوومەتی عێراق هێشتا وەک بێگانە مامەڵە لەگەڵ کوردانی فەیلی دەکات و دەشڵێت،  سەرۆک بارزانی بە پەیامە گرنگەکانی بە سێ زمانی جیاواز، جارێکی تر پشتگیریی خۆی بۆ کوردانی فەیلی دووپات کردەوە.

لە یادی ٤٦ ساڵەی جینۆسایدكردنی كوردانی فەیلیدا، عەلی فەیلی، بەرپرسی نووسینگەی کاروباری کوردانی فەیلی لە بارەگای بارزانی، بۆ ماڵپەڕی فەرمیی پارتی دیموکراتی کوردستان دواو گوتی، ''ئەمڕۆ ٤ی نیسان ڕۆژێكی خەمناكە لە ساڵنامەی گەلی كوردستان  و ٤٦ ساڵ بەسەر جینۆسایدی کوردانی فەیلیدا تێپەڕ دەبێت کە بەهۆی كوردبوونەوە ڕووبەڕووی چەوساندنەوە و كۆمەڵكوژی و زوڵم بوونەوە و بە ڕۆژی شەهیدی کوردی فەیلی ناونراوە، ئەمڕۆش سەرۆک بارزانی بە پەیامە گرنگەکانی بە سێ زمانی جیاواز، جارێکی تر پشتگیریی خۆی بۆ کوردانی فەیلی دووپات کردەوە. 

عەلی فەیلی گوتیشی، ''ئێمە لە هەولێر بە فەرمانی سەرۆک بارزانی و بە ئامادەبوونی سەرۆکی هەرێم و سەرۆکی حکوومەت، بڕیاری دامەزراندنی سەنتەرێکی تایبەت بە کاروباری کوردانی فەیلیمان داوە کە سەرجەم ئامادەکارییەکانی لە هەموو ڕوویەکەوە تەواو بووە و ئەرکی ئەم سەنتەرەش بەدواداچوون دەبێت بۆ چارەنووسی ١٢ بۆ ١٨ هەزار بێسەروشوێن و گەڕاندنەوەی موڵک و ماڵی زەوتکراوی ١٠٠ هەزار خێزانی فەیلی دەشڵێ، بەداخەوە حکوومەتەکانی عێراق لە ٢٣ ساڵی ڕابردوودا هیچ هەنگاوێکی جدییان بۆ کێشەی ناسنامە و گەڕانەوەی کوردانی فەیلی نەناوە.

بەرپرسی نووسینگەی کاروباری کوردانی فەیلی جەختی لەوەش کردەوە، کە بەهۆی هەوڵەکانی سەرۆک بارزانییەوە بۆ یەکەمجار کوردانی فەیلی خاوەنی نوێنەری ڕاستەقینەی خۆیانن لە پەرلەمانی عێراق و گوتی، ''هەڵوێستەکانی سەرۆک بارزانی بەرامبەر بە کوردانی فەیلی هیوای گەورەن، چونکە ئەو تاکە ئومێدی ئێمەیە بۆ بەدەستهێنانی مافەکانمان.

بڵند ئیبراهیم