ئەڵمانیا-KDP.info-  د چارچۆڤێ ئاهەنگێن جەژنا نەتەوەیی یا نەورۆزێ دا ل باژێڕێ بۆن یێ وەلاتێ ئەڵمانیا، جەنابی سەرۆک مەسعوود بارزانی پەیامەکا گرنگ ئاراستەی ئامادەبوویان و هەمی کوردستانیێن دەرڤەی وەلاتی کر. د پەیامەکێ دا کو ب ناڤێ جەنابی وی هاتە خویندن، سەرۆک بارزانی وێ چەندێ دیار دکەت کو "نەورۆز نیشانەیا ژیانەڤە و ئازادیێ و دەستپێکەکا تازەیە بۆ گەلێ کورد".

سەرۆک د پەیاما خۆ دا، دیسا جەختێ ل سەر پێدڤیا ئێکڕیزی و تەبایا ناڤبەرا کوردان ل هەر جهەکێ جیهانێ بن، دکەت و داخازێ ژ ڕەوەندا کوردی دکەت کو ببنە باڵیۆزێن سەرکەفتی بۆ ناساندنا دۆزا ڕەوایا گەلێ خۆ و پاراستنا زمان و کلتوورێ کوردی. هەروەسا د پشکا دی یا پەیامێ دا، جەنابی سەرۆک ئاماژێ ب بارودۆخێ دەڤەرێ و مافێن گەلێ کورد ل پارچێن دی یێن کوردستانێ دکەت و هیڤیا ئاشتی و سەقامگیریێ بۆ هەمی لایەکی دخوازیت.

ئەڤە ژی دەقێ پەیاما جەنابی سەرۆک بارزانی یە:

ناڤێ خودێ مەزن و دلوڤان

خوشك و برایێت خوشتڤی

ئامادەبویێن بەڕێز

كوردستانی یێت عەزیز

زۆر بخێربێن بو ئەڤێ خرڤەبونا جەماوەری بهەلکەفتا جەژنا نەتەوەیی، جەژنا نەورۆزێ.

من ژدل دڤیا دگەل هەوەیێت عەزیز پشکداریێ د ئەڤێ مەراسیما پڕ جوش و خرۆشدا بکەم. بەلێ لبەر بارودۆخ و ئاڵۆزیێت كو لڤێ دەڤەرێ هەی بداخازا لێبورینڤە نەشیام دگەل وەدا پشكدار بم. من دڤێت پڕ بدل پیروزباهیا جەژنا نەوروزێ لوە و هەمی كوردستانیێت عەزیز ل كوردستانێ و ئەوروپا و ئەمەریكا و هەر جهەکێ دییێ ڤێ جیهانێ بكەم كو كورد تێدا دژین.

نەورۆز بتنێ هاتنا وەرزەک و نویبونەڤا سروشت و ڕێككەفتەک نیە، بەلكو نەورۆز بۆ كوردستانیان نیشانەیا ژیانەڤەوە و ئازادیێ یە، نیشانەیا دەستپێكەکا تازە و هەستانەڤە و ئومێد و هەلاتنا ڕوژەکا نوییە. نەوروز هیڤیا گەلەکێیە کو چجارا بۆ ماف و ئازادیا خو دەست لخەبات و  بەرخودانێ بەرنەدایە. ئاگرێ نەوروزێ هەزاران ساڵە د دڵی هەر كوردستانیەكێ دایە و پەیامە بو هەمی جیهانێ كو ئەڤ گەلە خودان ئیرادەیا خویە و هیچ بەربەست و ستەمكارەك نەشیا ئەوێ ئیرادەیێ ڕابگریت. نەورۆز ئاگرەکە بو ئازادی و باوەڕبخوبون و خۆنەچەماندنێ ددلێ تاك تاكێن كوردستانیاندا.

كوردستانیێن هێژا و خۆشتڤی،
ئەم کورد لهەر جهەكێ بین، لکوردستانێ یان لئەوروپا یانژی ئەمەریكا یان هەر جهەکێ دی یێ ڤێ جیهانێ، یەک پەیاما سەرەكی مە همیا پێکڤە کوم دکەت، ئەوژی ناسنامەیا کوردایەتی و ڤیانا ئازادیێ یە.

زۆر دلخوشم كو نوکە ل باژێڕێ (بۆن) یێ ئەڵمانیا ئەڤ هژمارا زۆر یا وڵاتیێن كورد دەبینم كو ئەڤە بخوە نیشانەیا ئێك ڕیزی و هەڤدەنگیا كوردانە. نیشانا ئەوێ چەندێیە کو کورد لهەر جهەکێ بیت دشێن ب یەک دلی و یەکدەنگی بو ماف و ناسنامەیا خوە مل ب ملێ ئێک ڕابوەستن، ئەو چەندژی ڕێکا دروستە و ڕێکا ڕزگاربوونێیە. داخازێ لوە دكەم لهەمی دەمەکێدا ئەڤێ ئێکڕیزی و ئێک دەنگیا خو بپارێزن، نوکە ئەم لسەردەمەێكدا دژین كو هەمی جیهانێ چاڤێن وان لسەر كوردانە. ئەگەر ئەم بخوە هەبین و ئێك ڕیز و پشت و پەنایا ئێک و دوو بین، پشتڕاست بن جیهانیش دۆست و هاریكار و پشتەڤانێ مەیە.

وڵاتاتێن ئەوروپی یێت بویە ماڵا دوویەما هژمارەکا زور لكوردێن هەر چار پارچا، بەلێ پشتڕاستم دلێ وە هەمیان یێ دگەل خاك و نیشتیمان وڵاتدا.

ئەز داخازێ لوە دكەم زاروکێت هنگو لزمان و كولتوورێ کوردی نەهێنە دابڕاندن و هەر كوردەك كو لدەرڤەی كوردستانێ دژیت پێتڤیە باڵیۆزەکێ ژهەژیێ نەتەوەیا خوبیت و نموونەیا سەرەدەریا شارستانی و بەهایێن بلندێن گەلێ خوبیت و ڕێز ل یاسا و ڕێسایێن وان وڵاتان بگرن کو ساڵانەکە هون تێیدا دژین و ژبو وە وەک پەناگەهەک بوینە.

كوردستانیێت خۆشتڤی، خوشك و برایێت عەزیز
جهێ خۆشحاڵیێیە كو ڕۆژئاڤایێ كوردستانێ ل كارەسات و نەهامەتیان هاتە پاراستن و هیڤیدارم هەم حكوومەتا سووریا و هەمیش ئەمەریكا و هاوپەیمانان ڕێز لە ماف و داخوازیێت گەلێ كورد ل سووریا بگرن. هەروەها پشتەڤانیا پڕۆسەی ئاشتیێ ل توركیا دەكەین و هیڤیدارین بگەهیتە ئەنجامەکێ باش کو دخزمەتا هەمی لایەكدا بیت.

ددەمێ نوکەدا کو جیهان پڕە لگوهڕینێن مەزن، مخابن ناوچەیا مە ب شەڕ و ئاڵۆزیاندا دەرباز دبیت، دڤی بارودوخێ بەرتەنگدا كو جیهان بگشتی پێتڤی بئاشتی و ئارامیێ هەیە، پەیاما گەلێ كوردستانێ هەمی گاڤا پەیاما ئاشتی و ئارامی بویە. هەمی بزاڤێن مە ئەو بوینە كو گەلێ كوردستانێ نەبیتە پشکەک لوان كێشە و ململانێیان. هیڤیدارین خوشك و برایێت مە لڕۆژهەڵاتێ كوردستانێ و هەروەها هەرێما كوردستانێ لشەڕ و ئاڵۆزی و نەخۆشیێت کو لدەڤەرێ هەی دپاراستی بن.

لدوماهیێ جارەکا دی پیروزباهیا جەژنا نەوروزێ لوە دكەم و هیڤیا خوشی و ساڵەکا پڕ بەختەوەری و شادی بۆ هنگۆ دخازم. لێرەدا داخازیێ لوە دكەم وەك خوشك و برا پشت و پەنایا ئێک بن و بەها و پڕەنسیپێن نەتەوەیی لەسەرڤەیی هەمی بەرژەوەندی و هزر و ئایدیۆلۆژیایەكێ دابنێن. مە هەمیا ل كوردستانێ ئومێد و هیڤیێن زۆر، ب هێز و شیان و كاریگەریا ڕەوەندا كوردی و كوردێت دەرڤەی كوردستانێ هەنە بو بهێزكرن و ناساندنا دۆزا ڕەوایا گەلێ كوردستانێ بجیهانێ.
نەوروز و ساڵەکا خۆش بو وە، من ئومێدەکا زۆر ب پێشە ڕۆژا گەلێ كوردستانێ هەیە و سەركەفتن ژی هەر بۆ گەلێ مەیە.

سڵاڤ ل گیانێ پاکێ شەهیدێت ڕێکا ئازادی یێ ل هەر جهەکی بن
بفەر دزانم سوپاسیا کۆنفدراسیۆنا رەڤەندا کوردی بکەم بۆ زەحمەتا کێشای.
نەوروزا وە پیرۆز و بمێنن دخێر و خۆشیاندا.