هەولێر-KDP.info- وتەبێژی فراکسیۆنی پارتی لە ئەنجومەنی نوێنەرانی عێراق ڕایگەیاند، لە هەفتەی داهاتوودا پرسی سەرۆکایەتیی لیژنە پەرلەمانییەکان یەکلا دەکرێتەوە و پارتی دیموکراتی کوردستانیش سەرۆکایەتیی دوو لیژنەی گرینگ بەڕێوەدەبات.
د. دانەر عەبدولغەفار، وتەبێژی فراکسیۆنی پارتی لە ئەنجومەنی نوێنەرانی عێراق، لە لێدوانێکی تایبەتدا بۆ ماڵپەڕی فەرمیی پارتی دیموکراتی کوردستان، پەیوەست بە دیاریکردنی سەرۆکایەتیی لیژنەکانی پەرلەمانی عێراق گوتی، ''پێشتر ژمارەیەک لیژنە دیاری کراون و بڕیارە لە هەفتەی داهاتوودا ئەو لیژنانەی کە ماون یەکلا بکرێنەوە.
وتەبێژی فراکسیۆنی پارتی ئەوەشی خستەڕوو، کە بەپێی ئیستحقاقات، کورد لە پەرلەمانی عێراق سەرۆکایەتیی چوار لیژنەی بەردەکەوێت، لەو چوار لیژنەیەش، پارتی دیموکراتی کوردستان بە سەرۆکایەتیی دوو لیژنەی گرینگ لە ئەنجومەنی نوێنەران بەڕێوە دەبات.
قائید میرۆ