هەولێر-KDP.info- پاتریارکی کەنیسەی ڕۆژهەڵاتی ئاشووری لە عێراق و جیهان، بە توندی سەرکۆنەی بەئامانجگرتنی ماڵی سەرۆکی هەرێمی کوردستان لە دهۆک دەکات و ڕایدەگەیەنێت کە ئەم کارە هەوڵێکی ڕەتکراوەیە بۆ تێکدانی ئاشتی و سەقامگیری.
لە بەیاننامەیەکی فەرمیدا کە لەلایەن پاتریارک مار ئاوا سێیەم، پاتریارکی کەنیسەی ڕۆژهەڵاتی ئاشووری لە عێراق و جیهان بڵاوکراوەتەوە، هاتووە کە بەئامانجگرتنی ماڵی نێچیرڤان بارزانی، سەرۆکی هەرێمی کوردستان لە شاری دهۆک، زیان بە ئاسایش و سەقامگیری گشتی دەگەیەنێت. کەنیسەی ئاشووری هاوسۆزی و پشتگیری خۆی بۆ سەرۆکی هەرێم دووپات دەکاتەوە و داوا لە لایەنە پەیوەندیدارەکان دەکات لێکۆڵینەوەی پێویست ئەنجام بدەن تاوەکو تاوانباران ڕووبەڕووی یاسا بکرێنەوە و ڕێگری لە دووبارەبوونەوەی ئەم جۆرە ڕووداوانە بکرێت.
هەروەها پاتریارکی کەنیسەی ڕۆژهەڵاتی ئاشووری جەخت لە گرنگیی تەبایی و پێکەوەژیانی سەرجەم پێکهاتەکانی عێراق و هەرێمی کوردستان دەکاتەوە وەک برا و هاوبەش، تاوەکو ئاسایش و ئارامی بۆ هەمووان بەبێ جیاوازی بپارێزرێت و گیانی لێبوردەیی لە نێوان پێکهاتەکاندا بەهێزتر بکرێت.
ئەم هەڵوێستەی کەنیسەی ئاشووری لە کاتێکدایە کە هێرشە درۆنییەکەی سەر ماڵی نێچیرڤان بارزانی سەرۆکی هەرێمی کوردستان لە شاری دهۆک، کاردانەوەی فراوانی لایەنە ئایینی و نیشتمانییەکانی لێکەوتووەتەوە و وەک مەترسییەک بۆ سەر ئاشتیی کۆمەڵایەتی و پێکەوەژیانی پێکهاتەکان لە هەرێمی کوردستان وەسف دەکرێت.