ھەولێر-KDP.info-ڕۆژی پێنجشەممە ١٢ی ئاداری ٢٠٢٦ پەیوەندییەکی تەلەفۆنی لە نێوان سەرۆک مەسعود بارزانی و بەڕێز تۆم باراک نوێنەری سەرۆک ترامپ بۆ کاروباری سووریا و باڵیۆزی ئەمەریکا لە تورکیا ئەنجام درا.
لەو پەیوەندییە تەلەفۆنییەدا بەڕێز تۆم باراک سڵاو و ڕێزی سەرۆک ترامپی بە سەرۆک بارزانی گەیاند و سوپاسی ڕۆڵی سەرۆک بارزانی کرد کە ھەمیشە بە سەرکردایەتییەکی حەکیمانە ئیدارەی سیاسەت و پاراستنی ئاسایشی ناوچەکەی کردووە، و ڕایگەیاند کە ئەمەریکا ھەمیشە وەک ھاوپەیمان و دۆست سەیری ھەرێمی کوردستان دەکات و بەردەوام دەبن لەسەر ھەماھەنگیان لەگەڵ ھەرێمی کوردستان. ھەروەھا بەڕێز نوێنەری سەرۆکی ئەمەریکا جەختی لەوە کردەوە کە بۆ ئەمەریکا ھەرێمی کوردستان و عێراق پێگەیەکی گرنگی ناوچەکەن و ئەوان ھاوکار دەبن کە لەم دۆخە ئاڵۆزەی ئێستای ناوچەکە کێشەکانی نێوان حکومەتی ھەرێمی کوردستان و حکومەتی فیدڕاڵی عێراق چارەسەر بکرێن بە جۆرێک کە لە بەرژەوەندی ھەردوولا بێت لە ھەموو بوارەکاندا.
بە ھەمان شێوە، سەرۆک مەسعود بارزانی سوپاسی سەرۆک ترامپی کرد و ڕێز و پێزانینی خۆی بۆی دەربڕی و سوپاسی بەڕێز تۆم باراکی کرد بۆ رۆڵە کاریگەرەکەی.
سەرۆک بارزانی جەختی لەوە کردەوە کە ھەرێمی کوردستان ھەمیشە خوازیاری سەقامگیری و ئارامییە بۆ تەواوی ناوچەکە و گەلی کوردستان ھەمیشە باوەڕی بە دیموکراسیەت و پێکەوەژیان و گفتوگۆ ھەیە و ڕایگەیاند کە ئێمە ھەمیشە بەشێک بووین لە چارەسەر و ھەرگیز بەشێک نەبوون و نابین لە ھیچ کێشە و ئاڵۆزییەک.
ھەروەھا سەرۆک بارزانی ئاماژەی بەو ھێرش و پەلامارە ناڕەوایانە دا کە لەلایەن ھەندێ ھێزی بەدەر لە یاسا دەکرێنە سەر ھەرێمی کوردستان.
ھەردوولا ھاوڕا بوون کە پێویستە ھەرێمی کوردستان و عێراق بەدوور بگیرێن لەم شەڕە و پارێزراو بن.