زاخۆ-KDP.info- لقێ ٨ ێ پارتی ل زاخۆ سمینارەکا جەماوەری ل سەر خەبات و شۆڕەشێن بارزانیێ نەمر یادا وەغەرکرنا وی بلند ڕادگریت.
ب هەلکەفتا ٤٧ سالیا وەغەرکرنا بابێ نەتەوەیی و ڕێبەرێ بزاڤا ڕزگاریخوازییا کوردستانێ (بارزانیێ نەمر)، ئەڤرۆ ل هۆلا بارەگایێ لقێ ٨ یێ پارتی دیموکراتی کوردستان ل زاخۆ، سمینارەکا جەماوەری یا بەرفرەهـ بۆ مامۆستایێ زانکۆیێ (دکتۆر فەرهاد محەمەد) هاتە سازکرن.
د سمینارێ دا، دکتۆر فەرهاد ب درێژی تیشک خستە سەر ڕۆلێ مێژوویی و قارەمانانە یێ بارزانیێ نەمر د ڕێبەرایەتیکرنا مللەتێ کورد دا.
ناڤبری ب هووری بەحسێ وان شۆڕەشێن مەزن کر یێن کو ل سەر دەستێ بارزانیێ نەمر هاتینە ئەنجامدان ژ پێخەمەت ڕزگارکرنا گەلێ کورد و ب دەستڤەئینانا مافێن ڕەوا، ژ وان ژی:
- ڕۆلێ وی یێ پێشەنگ د کۆمارا کوردستان دا: وەک فەرماندەیەکێ قارەمان یێ پاراستنا ئاخا کوردستانێ.
- شۆڕەشا مەزنا ئەیلوولێ: کو مەزنترین شۆڕەشا نەتەوەیی و سەرتاسەری بوو د دیرۆکا هەڤچەرخا کورد دا.
- شۆڕەشا گولانا پێشکەفتنخواز: کو درێژەپێدەرا کاروانێ خەبات و ئیرادەیا مللەتێ کورد بوو.
هەروەسا د سمینارێ دا هاتە دیارکرن کو قارەمانی و بلیمەتییا بارزانیێ نەمر، وەک سەرکردەیەکێ کارێزما، شیای بزاڤا کوردی ژ بازنەیەکا تەنگ ببەتە ئاستێ جیهانی و ببیتە قوتابخانەیەک بۆ فێربوونا وانەیێن کوردینی و خۆراگریێ.
ئەڤ چالاکیە ل بارەگایێ لقێ ٨، نیشانا وەفاداری و پابەندبوونا کادر و لایەنگرێن پارتی یە ل دەڤەرا زاخۆ ب وێ رێبازا پیرۆز یا کو ب سەرکردایەتییا سەرۆک مەسعود بارزانی بەرەڤ ئاییندەیەکی گەشتر هەنگاڤان دهاڤێژیت.