چەمچەماڵ-KDP.info- هاووڵاتیانی چەمچەماڵ، سوپاسی دەزگای خێرخوازیی بارزانی و دەزگای ڕوانگە و كوردستان فاونده‌یشن ده‌كه‌ن كه‌ لەگەڵ كارەساتی لافاوه‌كه‌، بەهانایانەوە چوون و پێداویستییان بۆ دابین كردن، ئه‌وان ده‌ڵێن، هاوكاریی ئەو ڕێكخراوانە نەبووایە، ژیان بۆمان زۆر قورس دەبوو و كارەساتەكەش گەورەتر دەبوو.

سەردار حوسێن، هاووڵاتی لە گەڕەكی ڕاپەڕینی چەمچەماڵ، بە ماڵپەڕی فەرمیی پارتی دیموكراتی كوردستانی ڕاگەیاند، سوپاس بۆ ڕێكخراوەكانی دەزگای خێرخوازیی بارزانی و دەزگای ڕوانگە و كوردستان فاونده‌یشن، لەگەڵ كارەساتی لافاوی شارەكەماندا، بەهانامانەوە هاتن و پێداویستییان بۆ دابین كردین، بەڕاستی هاوكاریی ئەو ڕێكخراوانە نەبووایە، ژیان بۆمان زۆر قورس دەبوو، ئێستا ئێمە و ماڵ و منداڵمان لەنێو پێخەفی گەرم پشوو دەدەین و خۆراكی پێویستمان بۆ دابین كراوە.

ڕۆژانی هەشت و نۆی ئەم مانگە، شەپۆلێكی چڕی بارانبارین تەواوی هەرێمی كوردستانی بە ڕێژەی جیاواز گرتەوە و لە چەند ناوچەیەكی دەڤەری گەرمیان لافاو دروست بوو، بەڵام ئەوەی لە هەموویان زیاتر زیانی بە ماڵی هاووڵاتیان گەیاند، لافاوەکەی شارۆچكەی چەمچەماڵ بوو، ئەمەش وای كرد هەر زوو دەزگای خێرخوازیی بارزانی و دەزگای ڕوانگە و كوردستان فاوەندەیشن، بە بڕیاری سەرۆك بارزانی بەتەنگیانەوە بچن و لەپاڵیشیاندا هاووڵاتیان بە ئاستی جیاواز بەشداریی هەڵمەتی هاوكاری بكەن.

عەلی مام ئەنوەر، چالاك و هاووڵاتی لە چەمچەماڵ، بۆ ماڵپەڕی فەرمیی پارتی دیموكراتی كوردستان گوتی، هەرسێ ڕێكخراوی دەزگای خێرخوازیی بارزانی، دەزگای ڕوانگە و كوردستان فاوەندەیشن، زۆر باش هاتن بەدەم هاووڵاتییانی لێقەوماوی چەمچەماڵ، بەڕاستی ئەو كارەساتە گەورەیەی لەم شارە ڕووی دا، هاوكاریی و فریاگوزاریی ئەم ڕێكخراوانە نەبووایە، كارەساتەكە گەورەتر دەبوو، بۆیە ڕێكخراوی نیشتییمانیی لەم جۆرە زۆر گرنگە و خەڵك بەگشتی سوپاس و دەستخۆشی بۆیان هەیە، لەگەڵ دابەشكردنی پێداویستیی كوالیتی زۆر باش، بەمانای مرۆڤایەتی كارمەندەكانیان مامەڵە لەگەڵ زیانلێكەوتووان دەكەن و هاوكاریانن لە شووشتنەوەی ماڵ و گەڕەك و تاكو دابینكردنی هەموو پێداویستیی ناوماڵ بۆیان.

"ئێمە لە چەمچەماڵ بێكەس بووین، دەستخۆشی لەم ڕێكخراوانە دەكەین كە بەفریامانەوە هاتن، ماڵ و ناوماڵمان بەتەواوەتی لەدەست دا، دابینكردنی ئەم پێداویستیانە بەڕاستی هاوكارییەكی زۆر باش بوو بۆمان و دڵخۆش بووین، خوای گەورە ئەوانە دڵخۆش بكات كە ڕایانسپاردوون بەفریامانەوە بێن، داوا دەكەین هاوكارییەكانیان بۆمان زیاد بكەن و خەڵكی چەمچەماڵ بەڕاستی زیانمەندی گەورە بوون و پێویستییمان بە هاوكارییانە". ئەمانە گوتەی یوسف محەمەدن بوو لە كاتی وەرگرتنی پێداویستیی ناوماڵ، بە ماڵپەڕی فەرمیی پارتی دیموكراتی كوردستانی گوت.

عەتا محەممەد، سەرۆکی کۆمیسیۆنی خزمەتگوزاری و بووژاندنەوەی چەمچەماڵ، لە کۆنفرانسێکی رۆژنامەڤانیدا كە پەیامنێری ماڵپەڕی فەرمیی پارتی دیموكراتی كوردستانیش ئامادەی بوو،  رایگەیاند، زیاتر لە 1700 سەبەتەی خۆراک، 3200 بەتانی، 600 دۆشەک، 4000 مەتر کومبار، 900 سۆپا، 2000 دەبە نەوت، 10.000 سێتی ئاوی خواردنەوە و کەلوپەل بەسەر 600 ماڵدا دابەش کراوە. جێی ئاماژەیە، زۆربەی ئەو كارە خێرخوازیانە لەلایەن ڕێكخراوەكانی بارزانی و ڕوانگە و كوردستان فاوەندەیشنەوە بوون.

عەزیز ڕەسووڵ