موسا ئەحمەد
4ی ئاب بیست ساڵ به‌سه‌ر دامه‌زراندنی ماڵێكی گه‌وره‌دا تێپه‌ڕ ده‌بێت، ئه‌و ماڵه‌ی كه باوه‌شی پڕ له میهره‌بانی و گه‌رموگوڕیی كوردانه‌ی كردۆته‌وه و هیوا و ئومێدی بۆ كوردستانیان و مرۆڤایه‌تی له ناوچه‌كه‌دا دروستكردووه.
ده‌زگای خێرخوازیی بارزانی توانیویه‌تی بارزانی ئاسا كلتووری جوان و ده‌وڵه‌مه‌ندی مرۆڤیی كوردستانیان ڕێكبخات و پیشانی جیهانی مرۆڤی بدات.
ده‌زگای خێرخوازیی بارزانی له ماوه‌ی ئه‌و بیست ساڵه‌دا نوێنه‌رایه‌تیه‌كی جوانی كوردستانیانی كردووه، هه‌قیقه‌تی په‌رۆشی مرۆڤی كوردی بۆ پێكه‌وه ژیان و ڕێزگرتن له به‌ها مرۆڤییه‌كان گه‌یاندووەته جیهانی مرۆڤایه‌تی.
له بیست ساڵی تێكۆشانی مرۆڤیدا له‌سه‌ر راسپارده‌كانی جه‌نابی سه‌رۆك بارزانی، ده‌زگای خێرخوازیی بارزانی له‌گه‌ڵ خه‌م و مه‌ینه‌تییه‌كانی كوردستانیان و خه‌ڵكی ناوچه‌كه‌دابووه، هه‌موو كات پلانی هه‌بووه بۆ دروستكردنی مرۆڤێكی به‌هێز و كه‌شێكی ئه‌رێنی پێكه‌وه ژیان.
له یادی بیست ساڵه‌ی دامه‌زراندنی ده‌زگای خێرخوازیی بارزانیدا سوپاس و پێزانینمان هه‌یه بۆ هاووڵاتیانی كوردستان، بۆ سه‌رمایه‌دارانی خێرخوازیی كوردستان، كارمه‌نده ماندوونه‌ناسه‌كان، خۆبه‌خشان، هاوبه‌شانمان له كه‌سایه‌تی و رێكخراوه جیهانییه‌كان.
هاوكات سوپاس بۆ سه‌رۆكی بۆردی دامه‌زرێنه‌رانی ده‌زگای خێرخوازیی بارزانی و ده‌سته‌ی دامه‌زرێنه‌ران، كه به‌رده‌وام پاڵپشت و رێنیشانده‌رمان بوون.
پیرۆز بێت له كوردستانیان و مرۆڤدۆستانی جیهان.
* سه‌رۆكی ده‌زگای خێرخوازیی بارزانی