ھەولێر-KDP.info- بەرپرسی بەشی ڕێکخستنی پارتی دیموکراتی کوردستان پێشوازی لە باڵیۆزی ئوسترالیا لە عێراق کرد، لە دیدارەکەدا ئیدانەی دوایین پەلامارە درۆنییەکان بۆسەر ھەرێمی کوردستانی کرا، ھاوکات ھێمن ھەورامی جەختی لە بڕیار و سیاسەت و ڕێنماییەکانی سەرۆک بارزانی کردەوە بەوەی کە ھەرێمی کوردستان خوازیاری ئاشتی و سەقامگیرییە.
ئەمڕۆ یەکشەممە ٣ی٨ی٢٠٢٥، د.ھێمن ھەورامی، ئەندامی مەکتەبی سیاسی و بەرپرسی بەشی ڕێکخستنی پارتی دیموکراتی کوردستان لە پیرمام پێشوازی لە گلێن ماێڵز باڵیۆزی ئوسترالیا لە عێراق و ئیلیۆت مان بەرپرسی کاروباری سیاسی و ئابووری باڵێۆزخانەکە کرد.
لە سەرەتای دیدارەکەدا باڵیۆزی ئوسترالیا پوختەیەکی لەسەر بەردەوامی سیاسەتی پشتیوانی وڵاتەکەیان بۆ ھەرێمی کوردستان و ڕووبەڕووبوونەوەی ئاستەنگە ئابووری و دەستوورییەکان کردەوە و ئیدانەی دوایین پەلامارە درۆنییەکانی سەر دامەزراوە و ژێرخانی ئابووری ھەرێمی کوردستانی کرد.
دکتۆر ھێمن ھەورامی وێرای بە خێرھاتنی باڵیۆز، جەختی لە سیاسەتی نەگۆڕی پارتی کردەوە بەوەی کە ھەرێمی کوردستان خوازیاری پەیوەندیەکی تەندروستە لەگەڵ بەغدا لەسەر بنەمای دەستوور و پرەنسیپی سازان و ھاوسەنگی و ھاوبەشی بەڵام بەداخەوە ئەو عەقلیەت و فەرھەنگەی لە بەغدا باڵا دەستە باوەڕی بە فیدڕاڵیزم و دەستوور و پێکەوەژیان نەماوە.
لەبارەی دۆخی ئاساییشی ھەرێمایەتی و پەرەسەندنەکانی یەک دوو مانگی ڕابردوو و لێکەوتەکانی و پێگەو سیاسەتی ھەرێمی کوردستان، ھێمن ھەورامی جەختی لە بڕیار و سیاسەت و ڕێنماییەکانی سەرۆک بارزانی کردەوە بەوەی کە ھەرێمی کوردستان خوازیاری ئاشتی و سەقامگیرییەو بە شەڕ و پەلاماری سەربازی ھیچ کێشەیەک چارەسەر نابێت و بە دیالۆگ و پشوودرێژی بۆ بەرژەوەندی ھاوبەش و سەقامگیریی، دەرگای دیالۆگ بە کراوەیی چالاک بێت گرنگترە.
