ههولێر-KDP.info- جێگری پارێزگاری ههولێر ئاماژهی بۆ ئهوه كرد، بههۆی فراوانبوونی گوندهكان و زیادبوونی ڕێژهی دانیشتووان، به نهخشهی كهرتی گوندهكاندا دهچینەوە. دهشڵێ، ژمارهیهك لیژنه بۆ فراوانكردنی حهرهمی گوندهكان دروست دەکرێن.
مهسعوود كاڕهش، جێگری پارێزگاری ههولێر، به ماڵپهڕی فهرمیی پارتی دیموكراتی كوردستانی ڕاگهیاند، "لهبهر ئهوهی گوندەکانی كوردستان بهراورد بهو نهخشه كهرتییهی پێشتر بۆیان دیاری كراوه زۆر فراوان بوونە و بههۆی ئاوهدانی و گهشهكردنی ههرێمی كوردستان زۆربهی گوندهكان ڕێژهی دانیشتووانیان زۆر ههڵكشاوە، ههندێ گوند لهگهڵ سنووری ناحیه و قهزا تێكهڵ بوونه، بۆیە پێوست بوو جارێكی دیكه بە نەخشەی سنووری گوندهكاندا بچینەوە، گوند ههبووه پێشتر لهوانهیه ههر 20 ماڵێك بووبێت ئێستا ژمارهی دانیشتووانی زۆر زیادی كردووه، بۆ نموونه گوندی گهزنهی نزیك ههولێر ئێستا چوار ههزار خێزانه.
جێگری پارێزگاری ههولێر گوتیشی، "پێداچوونهوه به حهرهمی گوندهكان، ههندێ ڕێكاری یاسایی پێویسته، بۆ ئهنجامدانی ئهو پرسه قایمقام و بهڕێوهبهری یهكه كارگێڕییهكان ڕاسپێردراون ژمارهیهك لیژنه دروست بكەن كار لهسهر فراوانكردنی سنووری گوندهكان بكەن، چونكه ئهگهر بهپێی نهخشهی پێشتر بێت گوندهكان ناتوانن فراوان بن، له ئهنجامی كاری ئهو لیژنانه بڕیار لهسهر فراوانكردنی سنووری گوندهكان دهدرێت.
مهسعوود كاڕهش ئاماژهی بۆ ئهوەش كرد، خهڵك سوودمهند دهبن له پێداچوونهوهی نهخشهی گوندهكان، ئهگهر بهپێی نهخشهی پێشتری گوندهكان بێت، هاووڵاتییان دهتوانن تەنیا له چوارچێوهی حهرهمی گوند خانوو دروست بكهن، یانیش نۆژهن بكهنهوه، بهڵام ژمارهی گوندنشینان زیادی كردووه و پێویسته سنوورهكانیان فراوان بكرێت، بهڵام به شێوهیهكی یاسایی نهك به ههڕهمهكی.
قائید میرۆ