زاخۆ -KDP.info- جێگری سەرپەرشتیاری ئیدارەی سەربەخۆی زاخۆ گوتی دەڵێت، بڕیارە لە ئیدارەی سەربەخۆی زاخۆ یەک ملیۆن دار بچێندرێت و پشتێنەیەکی سەوزایی لە زاخۆ دروست بکرێت، تا ئێستا ٣٥ھەزار دار چێندراون.
ھێژا محەمەد، جێگری سەرپەرشتیاری ئیدارەی سەربەخۆی زاخۆ، بە ماڵپەڕی فەرمیی پارتی دیموکراتی کوردستانی ڕاگەیاند "ئیدارەی سەربەخۆی زاخۆ، پلانی ھەیە یەک ملیۆن دار لە زاخۆ بچێندرێت، لەو پلانە لە قۆناغی یەکەم ١٠٠ھەزار دار دەچێندرێت، تا ئێستا ٣٥ھەزار دار چێندراوە، ئەمساڵ بەھۆی وشکە ساڵی و کەشوھەوا، بڕیارە لە مانگی نۆ بەھەزاران دار بچێنین، ھەڵمەتەکەش بەردەوام دەبێت تا دەبێتە یەک ملیۆن دار."
ھێژا محەمەد گوتیشی "بڕیارە پشتێنەیەکی سەوزایی لە دەورەی زاخۆ دروست بکرێت و لەناو زاخۆش دووپارکی گەورە دروست دەکرێن، یەکێک لەسەر ڕووبەری ھەزار دۆنم زەوی و دووەم لە شوێنی پیشەسازی کۆن کە بڕیارە بگوازرێتەوە دەرەوەی شار و لە شوێنی ئەو پارکێک دروستدەکرێت، ئامانجیش پاککردنەوەی ژینگە و زیادترکردنی سەوزاییە، بۆیە ھەنگاوی زۆر باش دەنێین بۆ ئەوەی ڕێژەی سەوزایی لە زاخۆ زیادبکرێت و کەشوھەوایەکی پاک و ژینگەیەکی خاوێن دروست بێت."
بڵند ئیبراھیم