ھەولێر-KDP.info- سەرۆکی حکوومەتی ھەرێمی کوردستان لەگەڵ نوێنەری تایبەتیی سکرتێری گشتیی نەتەوە یەکگرتووەکان کۆبووەوە و ھەردوولا ھاوڕابوون لەسەر گرنگیی ڕێزگرتن لە مافە دەستوورییەکانی خەڵکی کوردستان و قەوارەی فیدراڵیی ھەرێمی کوردستان.
ئەمڕۆ سێشەممە ٤ـی شوباتی ٢٠٢٥، مەسروور بارزانی، سەرۆکی حکوومەتی ھەرێمی کوردستان، پێشوازیی لە محەممەد حەسسان نوێنەری تایبەتیی سکرتێری گشتیی نەتەوە یەکگرتووەکان لە عێراق و سەرۆکی نێردەی ( UNAMI) کرد.
لە کۆبوونەوەکەدا، بیروڕا لەبارەی بارودۆخی گشتیی عێراق و ناوچەکە و پێویستیی چارەسەرکردنی کێشەکانی نێوان ھەرێمی کوردستان و حکوومەتی فیدراڵ ئاڵوگۆڕ کرا.
ھەردوولا ھاوڕابوون لەسەر گرنگیی ڕێزگرتن لە مافە دەستوورییەکانی خەڵکی کوردستان و قەوارەی فیدراڵیی ھەرێمی کوردستان. ھەروەھا ھەموارکردنی یاسای بوودجەی فیدراڵ لەلایەن ئەنجوومەنی نوێنەرانەوە، بە ھەنگاوێکی ئەرێنی بە ئاراستەی چارەسەرکردنی کێشەکان دانرا.
سەرۆکی نێردەی یونامی لە عێراق، ڕۆڵی سەرۆک بارزانی و سەرۆکی حکوومەتی لە پاراستنی ئاسایش و ئارامیی ھەرێمی کوردستان و عێراق و ناوچەکە بەرز نرخاند.
سەرۆکی حکوومەت ستایشی ڕۆڵی بنیاتنەرانە و ئەرێنی نوێنەری تایبەتیی سکرتێری گشتیی نەتەوە یەکگرتووەکانی لە عێراق، لە ڕووی لەیەکنزیکردنەوەی لایەنە سیاسیەکانی عێراق و چەسپاندنی سەقامگیریی کرد.