خەبات -KDP.info- قایمقامی قەزای خەبات گوتی: پڕۆژەیەکی گەورەی گەشتیاری لەسەر زێی خەبات دروست دەکرێت، خەریکە ڕێکارەکان تەواو دەبن، بە ئەنجامدانی ئەو پڕۆژەیە ناوچەکە لەڕووی ئابووری و دەرفەتی کار و گەشتیاری دەبوژێنێتەوە.
کوێستان ئەحمەد بۆ ماڵپەڕی فەرمی پارتی دیموکراتی کوردستان گوتی: دەمێکە پڕۆژەیەکی گەشتیاریمان بۆ دەستەی وەبەرھێنان پێشنیار کردووە و لە دەستەی وەبەرھێنان تەواو بووە و ئێستا ھەندێک ڕێکار ماون، ئەوانیش تەواو بکرێن دەست بە پڕۆژەکە دەکرێت، چونکە ئەو پڕۆژەیە لەسەر زێی خەبات دەبێت و گرنگی زۆریشی بۆ ئێمە دەبێت، بوژانەوەیەکی باش بە ناوچەکە دەبەخشێت و زۆر ھەلی کاریش دەڕەخسێنێت، لەڕووی گەشتیاریش دەبوژێتەوە.
قایمقامی قەزای خەبات گوتیشی: پڕۆژەکە گەورەیە، ئوتێل، ڕێستورانت، مۆتێل، بەلەم و ھەموو ئەوەی پێویستە بۆ شوێنە گەشتیارییەکان دابین دەکرێت و لێی دروست دەکرێت، ناوچەکە دەبێتە شوێنێکی گەشتیاری گرینگ، چونکە دەکەوێتە سەر زێی گەورە و ئاوێکی زۆری ھەیە، هەر خۆشی شوێنێکی گەشتیارییە.
کوێستان ئەحمەد ڕوونیشی کردەوە: کۆمەڵێک وەبەرهێنەر داوای ئەو پڕۆژەیەیان کردووە، بەڵام دراوەتە بەوەبەرھێنەرێکی خۆماڵی و ڕێکارەکان تەواوبن بە سەرمایەی حەوت ملیۆن دۆلار دەست بە دروستکردنی دەکرێت، بە تەواوبوونیشی خەبات لە هەموو ڕوویەکەوە دەچێتە قۆناغێکی دیکەوە، ئەگەر ڕێکارەکان تەواو بکرێن، ئەمساڵ دەست بە جێبەجێکردنی پڕۆژەکە دەکرێت.
بڵند ئیبراھیم