زاخۆ-KDP.info- سەرپەرشتیاری ئیدارەی سەربەخۆی زاخۆ ڕایگەیاند، پڕۆژەیەکی گەشتیاریی تازە لەسەر لێواری خابوور دروست دەکرێت، کە یەکەم پڕۆژە دەبێت لەسەر ئاستی عێراق و ھەرێمی کوردستاندا و بۆ ساڵی داھاتوو تەواو دەبێت و دەکەوێتە خزمەت ھاووڵاتیانەوە، کە دەبێتە مایەی راکێشانی گەشتیاری زیاتری عێراق و ھەرێمی کوردستان بۆ ئیدارەی سەربەخۆی زاخۆ.
گوھدار شێخۆ، تایبەت بە ماڵپەڕی فەرمیی پارتی دیموکراتی کوردستانی گوت: لە چوارچێوەی گرنگیدانی حکوومەتی ھەرێمی کوردستان بە کەرتی گەشتیاری، لە زاخۆش بایەخی زۆر بە کەرتی گەشتیاری دەدرێت و بڕیارە پڕۆژەیەکی گەشتیاریی گرنگ جێبەجێ بکرێت، کە ئەویش دروستکردنی نافوورەیەکی گەورەیە و لە ساڵی ٢٠٢٥ لەسەر لێواری خابووری زاخۆ دروست دەکرێت، بۆ ئەوەی خەڵک سەردانی زاخۆ بکات و شوێنی جیاجیامان ھەبێت لە ڕووی گەشتیارییەوە، وەکو پردی دەلال و گەلی زاخۆ و بازاڕی کۆن، تا بتوانین سەرنجی خەڵکی رابکێشین.
شێخۆ گوتیشی: دیزاین بۆ پڕۆژەکە کراوە و بۆ دروستکردنی ئەو نافوورەیە، تیمەکان سوود لە ئەزموونی وڵاتی چین وەردەگرن و سەردانی ئەو وڵاتەشیان کردووە، بۆیە یەکێکە لە پێشکەوتووترین نافوورەکان ھاوشێوەی ئەوانەی لە وڵاتان دروست دەکرێن بە شێوەیەکی زۆر پێشکەوتوو، کە زۆر بڕگەی جۆراوجۆر لەخۆ دەگرێت، وەکو رووناکی و بەرزایی و زۆر شتی دیکە.
دەشڵێ: ئەم نافوورەیە کە دروست دەکرێت، یەکەم نافوورە دەبێت لەسەر ئاستی عێراق لە ڕووی کوالیتی و شێوازی دروستکردنی، بۆیە لەسەر ئاستی ھەرێمی کوردستان و عێراقیشدا نموونەیە و دەبێتە پڕۆژەیەکی گرنگ بۆ راکێشانی گەشتیاری زیاتر بۆ ئیدارەی سەربەخۆی زاخۆ.
بڵند ئیبراھیم