Kurdî  ■  كوردی  ■  عربي
SAT, 12 JUL 2025 21:58 Erbil, GMT +3
پارتی دیموکراتی کوردستان
ئازادی . دیموکراسی . دادپەروەری
 

بەیاننامەیەک لە مەکتەبی سیاسی پارتی دیموکراتی کوردستانەوە
| KDP.info


ھەولێر-KDP.info- بەبۆنەی ٤٨مین ساڵوەگەڕی بەرپابوونی شۆڕشی گوڵانی پێشکەوتنخواز، مەکتەبی سیاسیی پارتی دیموکراتی کوردستان بەیاننامەیەکی بڵاوکردەوە.

دەقی بەیاننامەکەی مەکتەبی سیاسی پارتی دیموکراتی کوردستان…

جەماوەری کۆڵنەدەری کوردستان 

ئەندام و لایەنگرانی تێکۆشەری پارتیمان

پێشمەرگە قارەمانەکان 

ئەمڕۆ چل و ھەشت ساڵ بەسەر ھەڵگیرسانەوەی شۆڕشی پێشکەوتنخوازی گوڵاندا تێدەپەڕێ، ئەو شۆڕشەی بە ڕابەرایەتی و ڕێنوێنیی بارزانیی نەمر و سەرکردایەتیی پارتیمان بەرپابوو. ھەڵگیرساندنی شۆڕشی گوڵان خەونی داگیرکەر و دوژمنانی خستە چاڵ و سەلماندی کە کورد نابەزێ و لە پیلان و گەلەکۆمەکێی نێودەوڵەتی بەھێزترە. 

چوار ساڵ دوای ڕێکەوتننامەی یازدەی ئازار و ئەو کاتەی  ڕژێمی بەعس خۆی لە پابەندییەکانی ڕێكکەوتنەکە و مافە ڕەواکانی کورد و کوردستانییەتی کەرکووک دزییەوە، سەرکردایەتیی پارتی و شۆڕشی کوردی لە نێوان ڕازیبوون بەو واقیعە تاڵە و دووبارە ڕووکردنەوە چەک و چیا، ڕێی دووەمی ھەڵبژاردوو بە پشتیوانیی پێشمەرگە و خەڵکی کوردستان درێژە بە شۆڕشی مەزنی ئەیلوول و داکۆکی لە مافە ڕەواکانی گەلەکەمان دراو، دیسان خۆ سازدارایەوە و لە بیست و شەشی گوڵانی ساڵی ١٩٧٦ و لە چیاکانی کوردستانەوە دووبارە ھەڵگیرسانەوەی شۆڕشی جاڕدرا و سەنگەرەکانی شەرەفمەندیی بەرگریی ئاوەدان کرانەوە. 

ھەڵگیرسانی شۆڕشی گوڵان بە دۆست و دوژمنانی سەلماند، کە شۆڕشی میللەتێکی ھەقخواز و خاوەن کێشەیەکی ڕەوایە، بۆیە نە بە ئاگر و ئاسن، نە بە پیلان و گەلەکۆمەکێی نێودەوڵەتی و نە بە نکووڵی و فشار خامۆش ناکرێ و لەناو نابرێ، پارتی و ڕێبازی بارزانییش ئەو پارت و ڕێبازە نین، کە بەو فشار و ھەڕەشە و دوژمنکارییانە کۆڵ بدەن و گۆڕەپانەکە چۆڵ بکەن و ڕێگا بدەن سەودا بە مافەکانی کوردەوە بکرێت، ھەروەھا سەرھەڵدانەوەی شۆڕش سەلماندی تاکە ڕێگا چارەی دۆزی کورد داننانە بە سەرجەم مافە نەتەوەیییەکانی ئەو میللەتە.

شۆِڕشی گوڵان، وەک درێژەپێدەری شۆڕشی مەزنی ئەیلوول و ئامانجەکانی، جگە لەوەی ئەو نائومێدییەی ڕەواندەوە، کە لە نسکۆدا ھاتە ئاراوە، بووە دەسپێکی قۆناغێکی دیکەی خەباتی کوردایەتییش، کە سەرباری ئاستەنگ و کێشەوبێشەکان، توانیی ئەو خەباتە ڕەوایە درێژە پێ بدات تا پێکھێنانی بەرەی کوردستانی و کۆبوونەوەی ھەموو ھێزە سیاسییەکان لە دەوری یەک ئامانج و ئەوەش بووە ھەوێن و داینەمۆی ڕاپەرینی پیرۆزی ساڵی ١٩٩١، کە ئاسۆیەکی نوێی لەبەردەم گەلی کورددا کردەوە، دواجار گەلی کورد سەربەرزانە و لەسەر خاکی خۆی دەسەڵاتی دیموکراسییانەی میللی خۆی لە چوارچێوەی ھەرێمی کوردستان دامەزراند و کۆی ئەوانەش، کە پیلانی جەزائیریان لە گەلی کورد و شۆڕشەکەی گێڕا، نابووت بوون و لەلایەن گەلانی خۆیانەوە سەرنگوون کران. 

ئەمڕۆ کە یادی ئەو شۆڕشە مەزنە دەکەینەوە، گەلەکەمان قۆناغ گەلێکی دوور و درێژی بڕیوە و سەدان ھەوراز و نشێوی دیکەی تێپەڕاندووە و چەندین لوغم و مین و پیلانی دیکەی پووچەڵ کردۆتەوە و دووبارە لە ئایندە و ئاسۆیەکی گەش دەڕوانێت، پارتی کە ئەو ھەموو پیلان و گەلەکۆمەکییەی لێکرا، وەک پێشڕەوی کوردایەتی و کۆڵنەدان، وەک ھەمیشە شۆڕەسواری مەیدانە و بە پاڵپشتیی گەل، حزبی ژمارە یەکی عێراق و کوردستانە، ھەڵوێستە سیاسییەکانی و خۆڕاگری و داکۆکیی مەردانەی لە خاک و مافی گەلی کوردستان، ھێندەی دیکە پێگە و متمانەی لەسەر ھەموو ئاستەکان بەھێز کردووە و بەرنامە نیشتمانسازی و ئاوەدانخوازییەکەشی جێی ئومێدی جەماوەرە، پتەویی ڕیزەکانی نێوخۆشی وای کردووە ئەھلی ئەو پڕکێشییە سەختانە و پێشڕەوایەتیی خەبات و ئاواتەکانی گەلەکەمان بێت. 

لە کاتێکدا یادی شۆڕشی گوڵان دەکەینەوە، بە متمانەیەکی زۆرەوە بەرەو کوردستانێکی ئاسوودە و سەقامگیر ھەنگاو دەنێین، بۆ بەھێزکردنی پێگەی سیاسی و ئابووری و دیپلۆماسی ھەرێم و، دووپاتی پشتیوانیمان لە دامەزراوە سەروەرییەکانی سەرۆکایەتی ھەرێم و حکوومەتێکی بەھێز و سەرتاسەری دەکەینەوە، کە لە ئاست ئەرکەکانی قۆناغەکەدا بن و، بتوانن سەقامگیریی کوردستان وەک ھەمیشە بپارێزن و ژیان و گوزەرانی خەڵک بەرەو باشتر و باشتر ببەن، ھاوکات کاراکردنەوەی پەرلەمانی کوردستان بە ھەڵبژاردنێکی گەل پەسەند، ھەڵبەتە ئەمەش پێویستی بە یەکڕیزی و یەکھەڵوێستیی نەتەوەیی و نیشتمانی ھەیە، ئەو یەکڕیزییەی، کە پارتیمان زۆرترین نەرمیی لە پێناودا نواند بۆ چارەسەرکردنی کێشە ھەڵواسراوەکانی ناو ھەرێم و ئەوانەی پەیوەستن بە دانوستانەکانی نێوان حکوومەتی ھەرێم و حکوومەتی فیدڕاڵ لە بارەی ھەڵبژاردن و بوودجە و شایستە داراییەکانی ھەرێمی کوردستان، لەلایەکی دیکەوە و لەو دەرفەتە جارێکی تر جەخت دەکەینەوە سەر پرەنسیپەکانی ھاوبەشی و ھاوسەنگی و سازان بۆ چارەسەرکردنی کێشەکان لە عێراقێکی فیدڕاڵدا.

لەو یادە پڕ شکۆیەدا، ھەم دیسان بەڵێن و پەیمان بۆ گەلی کوردستان و سەرۆک (مەسعود بارزانی) دووپات دەکەینەوە، وەک ھەمیشە لەسەر ھەمان ڕێبازی نەگۆڕ و ڕەسەن و ڕاستەقینەی کوردایەتی و نەتەوەیی و نیشتمانیمان بەردەوام بین بۆ پاراستنی قەوارەی سیاسیی شەرعییانەی ھەرێمی کوردستان و دەستکەوتەکانمان، ھەروەھا بەھێزکردنی بنەماکانی ئاشتەوایی و دیموکراسی و کولتووری لێبوردەیی و پێکەوەژیان.

لەو یادە پیرۆزەدا سڵاو و دروود بۆ دامەزرێنەر و ڕابەر و داڕێژەری ڕێبازی کوردایەتی (مستەفا بارزانی نەمر) و کاکە (ئیدریسی ھەمیشە لەیاد) و سەرجەم شەھیدانی ڕێگای سەروەری و ئازادی و ڕزگاریی کوردستان.

لە یادی شۆڕشی گوڵاندا، بەڵێن بۆ گیانی پاکی شەھیدان نوێ دەکەینەوە کە درێژەپێدەری ڕێبازەکەیان بین، کە ڕێبازی کوردایەتی و نیشتمانپەروەرییە بۆ پاراستنی ئەو ئەزموون و دەستکەوتانەی، کە بەرھەمی خوێنی بەنرخی ئەوانە.

دروود بۆ گیانی پاکی شەھیدان و سڵاو و رێز بۆ خانەوادە و کەسوکاری سەربەرزیان دەنێرین، سڵاو بۆ یادی ئەو تێکۆشەرانەی سەرقافڵەی گەشانەوەی ژیلەمۆی شۆڕش بوون.

گەرمترین پیرۆزبایی لە ئەندامان و لایەنگر و دۆستان و جەماوەری پارتیمان و کۆی خەڵکی کوردستان دەکەین، بە تایبەتیش یەک‌ بە یەکی پێشمەرگە قارەمانەکانمان کە بە جوامێری و لە سایەی سەری ئەواندا کوردستان پارێزراو و سەربەرز و ئارامە.

 

سەرکەوتن ھەر بۆ خەباتی ڕەوای گەلەکەمانە..

بەرز و شەکاوە بێت ئاڵای کورد و کوردستان..      

 

مەکتەبی سیاسیی پارتی دیموکراتی کوردستان

٢٥ی ئایاری ٢٠٢٤




دوایین هەواڵەکان

کابینەی نۆیه‌م ڕۆژ دوای ڕۆژ خزمەتگوزاریی زیاتری تەندروستی بۆ هاووڵاتیان دابین ده‌كات

SATURDAY, 12 JULY 2025 21:07:48

ھەولێر-KDP.info- لە ساڵی 2019 کابینەی نۆیەمی حکوومەتی هەرێمی کوردستان بە سەرۆکایەتیی مەسروور بارزانی پێکهێندرا، دوای سوێندخواردنی لە بەردەم نوێنەرانی خەڵكی کوردستان، کارنامەیەکی پڕ لە پلان و ئامانجی درێژخایه‌نى پێشکەش بە نوێنەرانی خەڵكی کوردستان کرد و ئامانجی خودی سەرۆکی حکوومەتی هەرێمی کوردستان و کابینەی نۆیەمیش، کوردستانێکی بەهێز بوو.

 
ڕاگەیێندراوێک لە بارەگای بارزانی بۆ ڕای گشتی

SATURDAY, 12 JULY 2025 21:07:56

ھەولێر-KDP.info- بارەگای بارزانی، پەیوەست بە کێشەکانی نێوان هەرێمی کوردستان و حکوومەتی عێراقی فیدڕاڵ، لەسەر یەکلاییکردنەوەی پرسی مووچە و بودجە و شاییستە داراییەکانی هەرێمی کوردستان، ڕاگەیێندراوێکی بڵاو کردەوە.

 
سه‌رۆکی ھەرێمی کوردستان سه‌ره‌خۆشى له‌ ڕۆژنامه‌نووس ئه‌حمه‌د زاویتى ده‌كات

SATURDAY, 12 JULY 2025 17:07:31

ھەولێر-KDP.info-  ئه‌مڕۆ شه‌ممه‌ 2025/7/12 به‌ڕێز نێچیرڤان بارزانى، سه‌رۆكى هه‌رێمى كوردستان، له‌ په‌یوه‌ندییه‌كى ته‌له‌فۆنیدا، بۆ كۆچى دواییى خوالێخۆشبوو‌ى باوكیان...

سەرۆکی حکوومەت سەرەخۆشی لە بەڕێوەبەری گشتیی کەناڵی کوردستان24 دەکات

SATURDAY, 12 JULY 2025 16:07:38

ھەولێر-KDP.info-  ئەمڕۆ شەممە، 12ـی تەممووزی 2025، مەسرور بارزانی، سەرۆکی حکوومەتی هەرێمی کوردستان، لە پەیوەندییەکی تەلەفۆنیدا، سەرەخۆشی لە ئەحمەد زاویتەیی بەڕێوەبەری گشتیی کەناڵی کوردستان24 کرد، بۆ کۆچی دوایی باوکی.

 
ملیۆنێک و 260 هه‌زار كه‌س له‌ڕێگه‌ی حاجی ئۆمه‌رانه‌وه‌ گه‌شتیان كردووه‌

SATURDAY, 12 JULY 2025 16:07:13

سۆران -KDP.info- بەڕێوەبەری نشینگه‌ و پاسپۆرتی ده‌روازه‌ی نێوده‌وڵه‌تی حاجی ئۆمه‌ران ده‌ڵێ "ساڵی ڕابردوو ملیۆنێک و 260 هه‌زار كه‌س له‌ڕێگه‌ی حاجی ئۆمه‌رانه‌وه‌ گه‌شتیان كردووه‌."

 


 
© 2023 Kurdistan Democratic Party, KDP

Contact