Kurdî  ■  كوردی  ■  عربي
WED, 21 FEB 2024 14:19 Erbil, GMT +3
پارتی دیموکراتی کوردستان
ئازادی . دیموکراسی . دادپەروەری
 

سەرۆکی حکوومەت پێشوازیی لە ژمارەیەک باڵوێز و کونسوڵ و نێردە و دیپلۆماتكارانی وڵاتان كرد
| KDP.info


هەولێر-KDP.info- سەرۆکی حکوومەتی هەرێمی کوردستان لە وتارێکدا لەمیانی پێشوازیکردنی لە ژمارەیەک باڵیۆز و کونسوڵ و نێردە و دیپلۆماتی وڵاتان لە عێراق و هەرێمی کوردستان رایگەیاند، زۆر شانازی دەكەین كوردستان بووەتە مێرگی سەقامگیری و پێكەوەژیان.

رۆژی پێنجشەممە، مەسروور بارزانی، سەرۆکی حکوومەتی هەرێمی کوردستان، لە ئێوارەخوانێکی تایبەتدا بەبۆنەی جەژنەکانی لەدایکبوون و سەری ساڵدا، پێشوازی لە باڵیۆز و کونسوڵی گشتی و نێردە و دیپلوماتی وڵاتان لە عێراق و هەرێمی کوردستان کرد.

لە وتارەکەیدا، سەرۆکی حکوومەتی هەرێمی کوردستان باسی لە ئاڵۆزییەکانی ئێستای رۆژهەڵاتی ناوەڕاست و هەڵوێستی هەرێمی کوردستان لەبارەی رووداوەکان و هەوڵەکانی بۆ چارەسەرکردنی کێشەکانی نێوان هەولێر و بەغدا لەگەڵ سەرۆکوەزیرانی عێراق و ئاڵنگارییەکانی گۆڕانی کەشوهەوا و کاریگەرییەکانی لەسەر خەڵک کرد.

دەقی وتارەکەی سەرۆکی حکوومەتی هەرێمی کوردستان:

بەرێزان..

مایەی خۆشحاڵییەكی زۆرمە بەخێرهاتنی هەمووتان بكەم، بۆ ئەم ئێوارەیە و بۆ ئاهەنگێڕانی پێشوەختەی كریسمس و داخستنی كۆتابەشی ساڵی 2023 كە كەمتر لە مانگێك دەچنە ناو ساڵێكی نوێ.

ئەمساڵ بۆ زۆرێكمان ساڵێكی زۆر سەخت بوو. زۆر ئالنگاری ئاسایش و ژینگەییمان هەبوون. شەڕ و ململانێكانی دوای 7ی ئۆكتۆبەر وێرانكەر بوون. نیگەرانی خۆمان دەبڕیووە، سەبارەت بە گیان لەدەستدانی خەڵكی سڤیل و بێتاوان، هێشتا جێگەی نیگەرانیمانە دەبینین خەڵكی سڤیل هێشتا گیان لەدەستدەن و نیگەرانی فراوانبوونی ناكۆكییەكانین لە ناوچەكە. هیوادارین چارەسەرێكی ئاشتییانە بدۆزرێتەوە بۆ ئەم كێشەیە، وەك چۆن باوەڕمان وایە هیچكات شەڕ چارەسەرێكی درێژخایەن نییە بۆ هیچ كێشەیەك. لە هیچ شەڕێكدا براوەی راستەقینە نییە، بەڵكو تەنیا ئاستی جیاوازی زیانەكان هەیە لەنێوان لایەنە ناكۆكەكان.

پێموایە لەم شەڕەدا وانەیەك هەیە دەبێ لێوەی فێربین. ئەوەیش ئەوەیە  ناكۆكییەكان دەكرێت چارەسەر بكرێن پێش ئەوەی بگەنە رووبەڕووبوونەوەی سەربازی. هەمان دۆخمان هەیە لێرە. هیوادارم بتوانین چارەسەرێك بۆ هەموو كێشە هەڵپەسێردراوەكان بدۆزینەوە، پێش ئەوەی بگاتە هەندێك بڕیاری سەخت كە ناچار بیت ئەو بڕیارانە بدەی. هەموو هەوڵی خۆمان دەدەین بۆئەوەی چارەسەری ئاشتییانە و درێژخایەن بدۆزینەوە.

ئەمساڵ لە تێڕوانینی ژینگەییشەوە ساڵێكی سەخت بوو، رووبەڕووی گۆڕانكارییەكانی كەشوهەوا و ئەو كێشانەی بووینەوە كە لە جیهان دەیانبینین. چەند رۆژێك لەمەوبەر لە ئیمارات بووم و بەشداریم لە كۆپ28 كرد. زۆر وتار و قسەی جوان پێشكەشكران لەبارەی ئەوەی چۆن ئەم كێشەیە چارەسەر بكەین؟ چەند رۆژێك لەمەوبەر قسەی كەسێكم خوێندەوە، دەڵێ، "جێگەی سەرسوڕمان نییە، تریلیۆنان دۆلار خەرج دەكەین و بەدوای ژیاندا دەگەڕێین لە دەرەوەی بۆشایی ئاسمان و لە هەسارەیەكی دیكە، بەڵام ژیان لەسەر ئەو هەسارەی ئێستا لەسەر دەژین لەناودەبەین؟" لەوانەیە زیادەڕۆیی هەبێت لە خەرجكردنی ئەو پارەی باسكراوە، بەڵام زۆر روونە كە لەراستیدا ئێمە هەسارەكەمان لەناودەبەین! هیوادارم بتوانین پێكەوە چارەسەرێكی راستەقینە بۆ كێشەكان بدۆزینەوە. دەردانی گازی دوانۆكسیدی كاربۆن بۆ ناو بەرگە هەوا، پیسكردنی خاك و ئاومان، پێویستە كۆتاییان پێبهێنین. لایەنی دیكە هەن و هەریەكەشیان بەرپرسیاریەتی جیاوازیان هەیە. ئێمە هیوادارین وەك لایەنێك بەلایەنی كەمەوە، بتوانین ئەم بەشەی هەسارەكەمان رزگار بكەین.

لەبارەی ئاسایش و ئالنگارییەكانی دیكەی رووبەروومان بوونەتەوە، بەلامەوە دوڕدۆنگییە دەبینم مرۆڤ ئەوی دیكە بكوژێت بۆ ئەوەی هەست بە سەلامەتی بكات. ئەوانی دیكە برسی دەكەن بۆ ئەوەی حەز و خولیاكانی خۆیان تێربكەن، هیوادارم هەموومان پێكەوە بین و بە پێكەوەژیان پێكەوە بژین. ئێمە لێرە لە كوردستان، هەوڵمانداوە شوێنی ژیان بۆ هەموو كەسێك دابین بكەین، خەڵكی لە باكگراوندی جیاواز و نەتەوە و ئایینی جیاواز. زۆریش شانازی دەكەین كوردستان بووەتە مێرگی سەقامگیری و پێكەوەژیان.

لە هەوڵداین بۆئەوەی كێشەكانمان لەگەڵ بەغدا چارەسەر بكەین. چەندین كۆبوونەوەمان هەبوو و چەند جارێك لەگەڵ سەرۆكوەزیران لە بەغدا قسەمكردووە. لەهەوڵداین بۆ دۆزینەوەی رێگەیەك بۆ چارەسەری هەندێك لەو كێشانە، بەتایبەتی بۆ كێشەی بودجە، كە خەڵكی چەند مانگێكە بەهۆیەوە تووشی كێشەبوون. هیوادارم ئەم كێشەیە ساڵی داهاتوو چارەسەر بێت. لە هەوڵداین بۆ رووبەڕووبوونەوەی هەموو ئەو كێشە ئەمنییانەی لە ناوچەكەدا هەن. سوپاسی هەمووتان دەكەین، كە هاوكار و پشتیوانمان بوون لە شەڕی رووبەڕووبوونەوەی توندڕەویی و داعش. بۆئەوەی رێگری لە سەرهەڵدانەوەی توندڕەویی و گەڕانەوەی گرووپی وەك داعش بكەین پێویستمان بە پێشخستنی دیموكراسی، دادپەروەری و یەكسانییە. لێرەوە داوا لە هەمووتان دەكەم، هاوكارمان بن بۆ ئەوەی ساڵی 2024 ساڵێکی باشترمان هەبێت.

جارێكی دیكە كریسمس و ساڵی نوێتان پیرۆز بێت و هیودارم ئێوارەیەكی خۆش بەسەربەرن..

 

زۆر سوپاس..




دوایین هەواڵەکان

سەرۆكی هەرێمی كوردستان پەیامێكی بڵاوكردەوە

WEDNESDAY, 21 FEBRUARY 2024 12:02:15

ھەولێر-KDP.info- ئەمڕۆ چوارشەممە، 21-02-2024، لە رۆژی جیهانیی زمانی دایکدا، سەرۆکی هەرێمی کوردستان جه‌خت له‌ پاراستن و پێشخستنی زمانی کوردی و زمانى دایك بۆ هەموو پێكهاتەكان دەکاتەوە. 

 
ئەنجومەنی وەزیران پرسی ئەنجومەنی پارێزگاکانی هەرێم تاوتوێ دەکات

WEDNESDAY, 21 FEBRUARY 2024 10:02:21

ھەولێر-KDP.info- ئەمڕۆ چوارشەممە، ئەنجومەنی وەزیرانی هەرێمی كوردستان، بە سەرپەرشتیی مەسروور بارزانی، سەرۆكی حكوومەتی هەرێمی كوردستان و ئامادەبوونی قوباد تاڵەبانی، جێگری سەرۆكی حكوومەتی هەرێمی كوردستان، کۆدەبێتەوە.

 
پشتیوان سادق: ئاسۆی ئاییندەمان زۆر گەش و رووناکە

TUESDAY, 20 FEBRUARY 2024 22:02:51

ھەولێر-KDP.info- ئەمڕۆ سێشەممە، لە بارەگای مەکتەبی ڕێکخستنی پارێزگای هەولێر، بەسەرپەرشتی دکتۆر پشتیوان سادق ئەندامی مەکتەبی سیاسی و بەرپرسی مەکتەبی ڕێکخستنی پارێزگای هەولێر و بە ئامادەبوونی چیا هەرکی یاریدەدەری بەرپرسی مەکتەب، لەگەڵ بەرپرس و مامۆستایانی وەزارەتی خوێندنی باڵا کۆبونەوە. 

 
سبه‌ی چەندین چالاکیی ئەکادیمی و کلتووری لەبارەی زمانی دایکەوە بەڕێوە دەچن

TUESDAY, 20 FEBRUARY 2024 21:02:45

ھەولێر-KDP.info- له‌ ڕۆژی جیهانیی زمانی دایكدا کە 21ی شوباتی هەر ساڵێکە، سبه‌ی چوارشه‌ممه‌ چەندین چالاکیی جۆراوجۆری ئەکادیمی و کلتووری لەبارەی زمانی دایکەوە لە هەرێمی کوردستان بەڕێوە دەچن.

 
سەفین دزەیی: پەیوەندییەكانمان لەگەڵ ژاپۆن توند و تۆڵ و بەهێزن

TUESDAY, 20 FEBRUARY 2024 20:02:44

ھەولێر-KDP.info- بەرپرسی فەرمانگەی پەیوەندییەکانی دەرەوەی هەرێمی کوردستان، ئاماژە بەوە دەکات، دەرفەتی وەبەرهێنان لە هەرێمی كوردستان لەبەردەم كۆمپانیا و وەبەرهێنەرە ژاپۆنییەكاندا هەیە و دەرگایان كراوەیە بۆ وەبەرهێنەرە ژاپۆنییەكان. دزەیی گوتیشی: پێكەوە لەگەڵ كۆمەڵگەی نێودەوڵەتی توانیمان داعش لەناوبەرین، بەڵام هێشتا کارەکە تەواو نەبووە و هەڕەشەی داعشیش ماوە.

 


 
© 2023 Kurdistan Democratic Party, KDP

Contact